મોદીનો વિકલ્પ ઊભા કરવાનાં વલખાં..

કોરોના કાળની વરવી અસરમાંથી માંડ માંડ બહાર આવેલો દેશ આઝાદીના સુવર્ણ મહોત્સવ વર્ષમાં મોંઘવારીનો બમણો માર ઝીલી રહ્યો છે એ વચ્ચે રાજકીય મોરચે અનેક આગેવાનોએ ૨૦૨૪ની લોકસભા ચૂંટણી પહેલાં વડા પ્રધાન નરેન્દ્ર મોદીના પર્યાય તરીકે પોતાને પ્રસ્થાપિત કરવાનું શરૂ કર્યું છે.

- હીરેન મહેતા

લોકસભા ચૂંટણીને હજી દોઢ વર્ષની વાર છે. આમ તો દર છ-આઠ ને થાય એટલે નવા સભ્યો ચૂંટવા મતદાન થતું જ હોય છે. જો કે લોકસભા અને વિધાનસભાની ચૂંટણી અલગ અલગ મુદ્દે લડાય છે એટલે એ બન્નેની સરખામણી અસ્થાને છે.

કોઈ પણ ચૂંટણીની તૈયારી માટે દોઢ વર્ષ આમ તો પૂરતો સમય કહેવાય, પણ રસ્તો અને મંજિલ બન્ને શોધવાનાં હોય ત્યારે કોઈ તૈયારી પૂરતી ન કહેવાય. દેશના ભાજપવિરોધી રાજકીય પક્ષોની આ હાલત છે. અરવિંદ કેજરીવાલ, મમતા બેનરજી, નીતિશ કુમાર તથા તેલંગણના મુખ્ય પ્રધાન કે. ચંદ્રશેખર રાવ, એ બધાંને વડા પ્રધાનની ખુરસી દેખાય છે. બધાંને નરેન્દ્ર મોદીની જગ્યાએ ગોઠવાઈ જવું છે અને એટલે જ હવે પછીના અઢાર મહિના એમના વચ્ચે સંગીતખુરસીની રમત ચાલવાની છે.

૨૦૧૦ના દાયકામાં મોદી પોતે ગુજરાતથી રાષ્ટ્રીય સ્તરે આવ્યા હતા એટલે દિલ્હી, બંગાળ, બિહાર કે તેલંગણના મુખ્ય પ્રધાન પણ રાષ્ટ્રીય રાજકારણમાં આવવાનું વિચારે એમાં કશું ખોટું નથી. સમસ્યા એ છે કે આ ચારેય એકસરખી વ્યૂહનીતિ અપનાવીને કેન્દ્રમાં પહોંચવા માગે છે. આ ચારેય આગેવાનો મોદીને તો અંગત ધોરણે પોતાના રાજકીય દુશ્મન માને જ છે, એ ચારેય પોતે અંદરોઅંદર પણ એકમેક સામે શતરંજની જેમ ચાલ ચાલી રહ્યાં છે એટલે એમની પહેલી લડત તો એકમેક સામે જ છે અને આગામી દિવસોમાં એમની અડધી શક્તિ એકબીજા સામે પોતાની સર્વોપરિતા પુરવાર કરવામાં ખર્ચાઈ જવાની છે. મોદી સામેનો મુકાબલો તો એ પછી આવશે.