કર્મચારીઓની મોટા પાયે છટણીમતલબ નિકલ ગયા હૈ તો પેહચાનતે નહી..

અમેરિકામાં આ વર્ષે સવા લાખથી વધુની નોકરી ગઈ, જેમાં ભારતીયો મોટી સંખ્યામાં છે. સ્ટાર્ટ-અપ કંપનીની દૂરથી રળિયામણી લાગતી સૃષ્ટિ, એનાં અવાસ્તવિક વૅલ્યુએશન, વધુપડતા મહત્ત્વાકાંક્ષી વિકાસ માટે હજારોની સંખ્યામાં કર્મચારીઓની નિમણૂક, વગેરેની જાણે હવે ચરબી ઊતરવા માંડી છે. નોકરીમાંથી પાણીચાં, નવી ભરતી બંધ.. એક સમયે જેમ ડૉટકૉમના ફુગ્ગામાંથી હવા નીકળી ગયેલી એના પુનરાવર્તન જેવા આ સમય વિશે જાણવું રસપ્રદ થઈ પડશે.

- કેતન મિસ્ત્રી (મુંબઈ)

અમેરિકાના સાન ફ્રાન્સિસ્કોમાં રહેતાં ફેસબુકમાં કમ્યુનિકેશન મૅનેજર અનેકા પટેલ હાલ મૅટરનિટી લીવ પર છે. ગયા શુક્રવારે મળસકે એમણે ઑફિસના ઈ-મેઈલ ચેક કર્યા.. એમને ખયાલ હતો કે કંપનીમાં મોટે પાયે છટણી થઈ રહી છે અને માર્ક ઝકરબર્ગનો ઈ-પત્ર ગમે ત્યારે આવશે. અને સવારે સાડા પાંચ વાગ્યે એ ઈ-મેઈલ આવ્યોઃ છટણીમાં એમનું નામ હતું..

દુબઈમાં રહેતાં પ્રિયા પટેલ મેટા (ફેસબુકનું નવું નામ)માં સાત વર્ષથી પ્રોડક્ટ માર્કેટિંગનાં હેડ હતાં. એ મિડલ ઈસ્ટ, તુર્કી અને આફ્રિકા ખાતેનો કારભાર સંભાળતાં હતાં. એમના કહેવા મુજબ, ગયા બુધવારે મેટાના ૧૮ વર્ષના ઈતિહાસમાં પહેલી વાર કુલ સ્ટાફના ૧૩ ટકા અથવા અંદાજે ૧૧,૦૦૦ કર્મચારીને છૂટા કરવાનો નિર્ણય લેવામાં આવ્યો છે. કમનસીબે એ ૧૧,૦૦૦માં હું પણ છું..

હૈદરાબાદના હિમાંશુનો કિસ્સો જરા વિચિત્ર છે. મેટમાં નોકરી મળતાં એ કેનેડામાં સ્થિર થવા ગયા. બે જ દિવસ નોકરી કરી ને ત્રીજા દિવસે એમને કાઢી મૂકવામાં આવ્યા. એમનો સમાવેશ પણ પેલા ૧૧,૦૦૦માં થતો હતો!

ફેસબુક, ઈન્સ્ટાગ્રામ અને વ્હૉટ્સઍપ જેવી ઍપ્સ ચલાવતી માર્ક ઝકરબર્ગની કંપની મેટાએ એકસાથે ૧૧,૦૦૦ કર્મચારીઓની છટણી કરી એ આજકાલ ગરમ વિષય બન્યો છે. આ તો અમેરિકાની વાત છે, એમાં આપણા કેટલા ટકા? એવું કહેનારા જાણી લે કે ફેસબુક તથા વિવિધ કંપનીઓમાંથી હાલ આડેધડ છટણી થઈ રહી છે, એમાં ભારતીય યુવાન-યુવતીઓની સંખ્યા મોટી છે. આવી કંપનીની ભારત કે દુબઈની શાખામાંથી નોકરી ગુમાવનારાની તો માત્ર નોકરી ગઈ છે, પરંતુ અમેરિકામાં રહીને નોકરી કરનારા અને હવે એ ગુમાવનારા જો સાઠ દિવસમાં બીજી નોકરી ન શોધે તો એમને દેશ છોડી દેવો પડે અથવા કોઈ બીજા કાયદેસરના રસ્તા અપનાવવા પડે. આમાંના ઘણા એવા છે, જેમણે સારી કંપનીમાં સારા પગારની નોકરી મેળવીને ઘર માટે લોન, ગાડી, વગેરે લીધાં છે. એના હપ્તાનું શું, હેલ્થ ઈન્સ્યોરન્સનું શું, વગેરે જાતજાતના પ્રશ્નો સામે આવ્યા છે.