તૈયાર રહેજો.. પરિવર્તન આવી રહ્યું છે!

અમારો પ્રચાર કોઈને કેમ દેખાતો નથી ? અમે તો લોકોની વચ્ચે જઈને કામ કરીએ છીએ.

- મુલાકાતઃ કેતન ત્રિવેદી (અમદાવાદ)

-અશોક ગેહલોત (રાજસ્થાનના મુખ્ય મંત્રી-ગુજરાત કોંગ્રેસના ચૂંટણીપ્રભારી)

૩ મે, ૧૯૫૧ના રોજ રાજસ્થાનના જોધપુરમાં જન્મેલા અશોક લક્ષ્મણસિંહ ગેહલોત ભારતીય રાજકારણના કેટલાક પીઢ અને ચુનંદા ખેલાડીઓ પૈકીના એક ગણાય છે. વિજ્ઞાન અને કાયદાના વિષયમાં સ્નાતક થયા પછી અર્થશાસ્ત્રમાં માસ્ટર્સ ડિગ્રી મેળવનારા અશોક ગેહલોત બહુ નાની વયથી રાજકારણમાં આવ્યા અને ફક્ત ૩૫ વર્ષની વયે રાજસ્થાન પ્રદેશ કોંગ્રેસ સમિતિના પ્રમુખ પણ બન્યા. અત્યારે ત્રીજી વખત રાજસ્થાનનું મુખ્ય મંત્રીપદ સંભાળી રહેલા ગેહલોત અગાઉ ઈન્દિરા ગાંધી અને પી.વી. નરસિંહ રાવના વડપણ હેઠળની કેન્દ્ર સરકારમાં મંત્રી પણ રહી ચૂક્યા છે. માર્ચ, ૨૦૧૮થી જાન્યુઆરી, ૨૦૧૯ સુધી એ ઑલ ઈન્ડિયા કોંગ્રેસ કમિટીના મહામંત્રીપદે પણ રહી ચૂક્યા છે.

૧૯૭૧માં બંગાળમાં શરણાર્થી કૅમ્પમાં એ સ્વયંસેવક તરીકે કામ કરતા હતા ત્યારે એમની સંગઠનની કુનેહ ઈન્દિરા ગાંધીના ધ્યાનમાં આવી અને એ પછીથી એમનો રાજકીય ઉદય થયો. અત્યારે પણ ગેહલોત સંગઠન પર મજબૂત પકડ ધરાવતા નેતા ગણાય છે. પિતા લક્ષ્મણસિંહ જાદુગર હતા એટલે જાદુગરીની કળા એમના આ પુત્રને સહજ સાધ્ય હોય એ સ્વાભાવિક છે અને અશોક ગેહલોત રાજકારણના ખેલમાં પોતાની આ કળા અનેક વાર દર્શાવી ચૂક્યા છે. કદાચ એટલે જ એમને રાજકારણના જાદુગર કહેવાય છે.

આ જાદુગર પર આજકાલ સૌની નજર છે. નજર એટલા માટે છે કે ૨૦૧૭ની માફક આ વખતે પણ એ ગુજરાતમાં કોંગ્રેસનું ચૂંટણીનું સુકાન સંભાળી રહ્યા છે. ૨૦૧૭માં પાટીદાર અનામત આંદોલનના ઓછાયા વચ્ચે હાર્દિક પટેલ, અલ્પેશ ઠાકોર અને જિજ્ઞેશ મેવાણીની ત્રિપુટીને કોંગ્રેસમાં લાવીને, રાહુલ ગાંધીને અનેક મંદિરની યાત્રા કરાવીને એમણે નરેન્દ્ર મોદી-અમિત શાહની જોડીને એમના જ હોમ ગ્રાઉન્ડમાં પડકાર ફેંક્યો હતો. એમની આ રણનીતિ મહદંશે સફળ પણ રહી હતી અને ડૂબવાના આરે આવેલી ગુજરાત કોંગ્રેસની બેઠકને ૭૭ના આંકડે પહોંચાડીને ગેહલોતે પક્ષમાં નવા પ્રાણ ફૂંક્યા હતા.