શિક્ષણ-સમાજસેવા-સંસ્કૃતિ પ્રસારના ત્રિવેણી સંગમ સમું એક વટવૃક્ષ ઊજવે છે વિરાટ અમૃત મહોત્સવ

૭૫ વર્ષમાં એક લાખથી વધુ વિદ્યાર્થી જ્યાં જ્ઞાન મેળવી ઋષિ સંસ્કૃતિના વાહક બન્યા એ સ્વામિનારાયણ ગુરુકુળ રાજકોટ સંસ્થાન આજે દેશ-દુનિયામાં શાખા રૂપી ૫૧ ડાળી ફેલાવીને બેઠું છે.

- દેવેન્દ્ર જાની (રાજકોટ)

દેશ આઝાદ થયો એના થોડા મહિનામાં સૌરાષ્ટ્રમાં ભારતીય ઋષિ સંસ્કૃતિ અને સંસ્કારના વારસાને જાળવવાની નેમ સાથે સ્વામિનારાયણ ગુરુકુળનો ઉદય થયો. ૭૫ વર્ષ પહેલાં રોપાયેલું એ બીજ આજે વટવૃક્ષ બન્યું છે અને એની શાખા રૂપી ડાળીઓ દેશ-વિદેશમાં ૫૧ સ્થળ સુધી વિસ્તરી છે. શ્રી સ્વામિનારાયણ ગુરુકુળ રાજકોટ સંસ્થાન હવે અમૃત મહોત્સવને ઊજવવાની તૈયારીમાં છે ત્યારે દુનિયાભરમાં ફેલાયેલા હરિભક્તો-લાખો વિદ્યાર્થીઓમાં હરખની હેલી ઊઠી છે. રાજકોટના આંગણે આ મહિને આ મહોત્સવ યોજાવાનો છે.

સ્વામિનારાયણ ગુરુકુળ રાજકોટ સંસ્થાનનો અમૃત મહોત્સવ બાવીસથી ૨૬ ડિસેમ્બર એમ પાંચ દિવસ લાખો લોકોની હાજરીમાં ઊજવાશે. આ વિરાટ ઉત્સવ માટે રાજકોટમાં મવડી-કણકોટ રોડ પર આશરે ૪૫૦ વીઘાં જમીનમાં ખાસ સહજાનંદ નગર ઊભું કરવામાં આવ્યું છે. આ અમૃત મહોત્સવ વિશે જાણીએ એ પહેલાં શ્રી સ્વામિનારાયણ ગુરુકુળ રાજકોટ સંસ્થાનના ઈતિહાસમાં ડોકિયું કરીએ..

રાજકોટ સ્વામિનારાયણ ગુરુકુળના કેન્દ્રનો આરંભ થયો જૂન, ૧૯૪૮માં અને એના સ્થાપક હતા સ્વામિનારાયણ સંપ્રદાયને એક નવી દિશા આપનારા શાસ્ત્રીજી મહારાજ ધર્મજીવનદાસસ્વામી. અમરેલી જિલ્લાના તરવડા ગામે ૧૮ જૂન, ૧૯૦૧ના રોજ એમનો જન્મ. બાળપણનું નામ અરજણ. માતા વીરુબાઈ તો પિતાનું નામ હતું ભૂરાભાઈ લાખાણી. નાનપણથી જ તેજસ્વી એવા અરજણનું પ્રાથમિક શિક્ષણ તરવડામાં થયું. જો કે ધર્મમાં રુચિ ધરાવતા આ બાળકે ૧૪ વર્ષની વયે ઘર છોડી વૈરાગ્ય લીધો. જૂનાગઢમાં સ્વામિનારાયણ સંપ્રદાયમાં પાર્ષદની દીક્ષા લીધી. પછી ૧૯૧૭માં સારંગપુરમાં સંત દીક્ષા લઈને એ બન્યા ધર્મજીવનદાસસ્વામી.