તેલની ધાર જોવામાં ભાવ આસમાને પહોંચ્યા..

તીખું-તળેલું વધુ ખાવાની આદતને કારણે ગુજરાતીઓનો તેલનો માથાદીઠ વપરાશ બહુ વધારે છે. આ જ કારણે ગુજરાતી ગૃહિણીના બજેટમાં તેલની અલગ જોગવાઈ હોય. દિવાળી જાય એટલે દરેક ગુજરાતીના ઘરમાં તેલની ખરીદીની ચર્ચા શરૂ થઈ જાય છે. આ વર્ષે તેલની ખરીદી પહેલાં તેલ અને તેલની ધાર જુઓ.. એવું માનીને એક મોટા વર્ગે ખાસ કરીને તેલ ખરીદવાનું ટાળ્યું, પણ હવે એમને આંચકો લાગ્યો છે. સૌરાષ્ટ્રમાં મગફળીનું સારું ઉત્પાદન છતાં સિંગતેલનો ભાવ આસમાનને આંબી ગયો છે.

- દેવેન્દ્ર જાની (રાજકોટ)

ગુજરાતીઓની થાળીમાં તેલની કોઈ આઈટેમ ન હોય તો જ નવાઈ. દેશમાં સરેરાશ ખાદ્ય તેલનો માથાદીઠ વપરાશ વાર્ષિક ૧૫-૧૬ કિલોનો છે, પણ ગુજરાતીઓમાં તેલનો વપરાશનો આંકડો સૌથી વધારે ૧૮થી ૨૦ કિલોનો છે. તેલના વપરાશના આ આંકડા જ ગુજ્જુઓનો તેલ પ્રત્યેનો લગાવ બતાવે છે. ચરબી કે ડાયાબિટીસ જેવી વ્યાધિની ચિંતા કર્યા વિના બસ મોજથી તીખું-તમતમતું અને તળેલું ખાવું એવો જ ગુજરાતીઓનો મિજાજ રહ્યો છે.

સૌરાષ્ટ્રના લોકોની તો જાણે ગાંઠિયા વિના સવાર પડતી નથી. તેલની અને એમાં પણ સિંગતેલની વાત નીકળે તો એની ચર્ચા સૌરાષ્ટ્રથી શરૂ થાય, કારણ કે સૌથી વધુ મગફળીનું ઉત્પાદન સૌરાષ્ટ્રમાં થાય છે. ભારતમાં વર્ષે ૨૩૦ લાખ ટન ખાદ્ય તેલનો વપરાશ છે, એની સામે ૧૪૫થી ૧૫૦ લાખ ટનની આયાત કરવામાં આવે છે. આમ હજી તેલના ઉત્પાદનમાં આપણે આત્મનિર્ભર બન્યા નથી. ૬૫થી ૭૦ ટકા ખાદ્ય તેલ આયાત કરવામાં આવી રહ્યું છે. ભારત જેવા વિશાળ દેશમાં તેલના વપરાશની પૅટર્ન પણ અલગ અલગ જોવા મળે છે. ઉત્તરનાં રાજ્યોમાં સરસવના તેલનો તો દક્ષિણનાં રાજ્યોમાં નાળિયેરના તેલનો વપરાશ વધુ છે. ગુજરાતીઓ કપાસિયા અને સિંગતેલનો વધુ વપરાશ કરે છે.