પ્રકૃતિને બચાવવાની દમદાર કળાત્મક અપીલ

સેતુ બાંધો કુદરત સુધી પહોંચવાનોઃ પોતાની વાત વ્યક્ત કરવા આરતી ઝવેરીએ વાંસ અને જ્યૂટનો ઉપયોગ કર્યો છે.

પ્રકૃતિ અને કલાકાર એ બન્ને સંવેદનશીલ હોય છે. સંહાર અને સર્જન જેમ પ્રકૃતિનો ક્રમ છે એમ અંદરની સંવેદના તૂટે ત્યારે એમાંથી જ સર્જન કરીને વ્યક્ત થવું એ કલાકારનો ક્રમ હોય છે. કદાચ એટલે જ પ્રકૃતિ સાથે સૌથી વધુ તાદાત્મ્ય કલાકાર જ અનુભવે છે.

પ્રકૃતિ સાથેની આવી તાદાત્મ્યતા એક કલાકાર પાસે કેવું ઉત્તમ સર્જન કરાવી શકે એ જાણવું હોય તો આવો, નવી દિલ્હીના લોધી એસ્ટેટ વિસ્તારમાં આવેલા ઈન્ડિયા હૅબિટાટ સેન્ટર ખાતે. આમ તો બાંધકામશૈલી માટે અત્યંત જાણીતું આ બિલ્ડિંગ પોતે જ ગ્રીન જીવનશૈલીનો સંદેશ આપે છે, પણ આ સેન્ટરની મધ્યમાં ખુલ્લી વિશાળ જગ્યામાં વાંસ, શણ અને ભંગારનાં મટીરિયલમાંથી તૈયાર કરવામાં આવેલું એક આર્ટ પ્રદર્શન પણ આપણને એ જ સંદેશ આપી રહ્યું છે કે કઈ રીતે આધુનિક જીવનશૈલી અને વધતાં જતાં ઔદ્યોગિકરણ-શહેરીકરણથી પ્રકૃતિને પારાવાર નુકસાન થઈ રહ્યું છે!