શતેશ્વર ચેતેશ્વર..

પ્રેરણાસ્રોત સમાન માતાને બહુ નાની ઉંમરે ગુમાવી દીધા પછી દૃઢ મનોબળના જોરે રાજકોટનો ‘ચિન્ટુ’ ક્રિકેટના મેદાનમાં આગળ વધતો ગયો. એની ધીરજ, ક્રિકેટ પ્રત્યેની નિષ્ઠા અને વિકટ સ્થિતિમાં દીવાલની જેમ અડીખમ ઊભા રહેવાની ક્ષમતાએ એને એક્સોમી ટેસ્ટ સુધી પહોંચાડ્યો. આ સિદ્ધિ મેળવનારો ચેતેશ્વર પૂજારા ગુજરાતનો પહેલો ક્રિકેટર છે.

- દેવેન્દ્ર જાની (રાજકોટ)

૫રિવારમાં ચિન્ટુના નામથી જાણીતો ચેતેશ્વર પૂજારા કોઈ પણ સ્થળે રમવા જાય અને સાંજે મૅચ પૂરી થાય એટલે અચૂક એની મમ્મી સાથે ફોન પર વાતચીત કરતો. આ હવે એનો ક્રમ બની ગયો હતો.

વાત છે ઑક્ટોબર, ૨૦૦૫ની. ચેતેશ્વર મંચ રમવા ભાવનગર ગયો હતો. એની ટીમ હારી ગઈ અને મૅચ વહેલી પૂરી થઈ એટલે મમ્મી રીનાબહેનને રૂટિન કરતાં એકાદ કલાક વહેલો, સાંજે ચાર વાગ્યે ફોન કર્યોઃ હું વહેલો રાજકોટ આવી જઈશ.. જો કે એ દિવસે કુદરતે કંઈક બીજું જ નિરધાર્યું હતું. ચેતેશ્વર રાજકોટ પહોંચ્યો એ પહેલાં એનાં માતા અકાળ મૃત્યુ પામ્યાં હતાં!

આ વાત છે ચેતેશ્વર ૧૭ વર્ષનો હતો ત્યારની. આ ઘટના ચેતેશ્વરના જીવનમાં મોટો બદલાવ લાવનારી હતી. જો કે માતાના નિધન પછી નિરાશામાં ધકેલાઈ ગયેલો ચેતેશ્વર મક્કમ મનોબળથી ફરી બેઠો થયો. એણે સખત પરિશ્રમ કર્યો અને પરિણામે સફળતાએ એનાં કદમ ચૂમ્યાં. ગયા શુક્રવારે (૧૬ ફેબ્રુઆરીએ) દિલ્હીના અરુણ

જેટલી સ્ટેડિયમમાં ઑસ્ટ્રેલિયા સામે ચેતેશ્વર એની કારકિર્દીની ૧૦૦મી ટેસ્ટ મૅચ રમવા મેદાનમાં ઊતર્યો. આ સિદ્ધિ મેળવનારો એ ગુજરાતનો પહેલો અને ભારતનો ૧૩મો ખેલાડી બન્યો. સ્વાભાવિક ૧ છે, ચેતેશ્વર પર અભિનંદનની વર્ષા થઈ, પરંતુ બહુ ઓછા લોકો જાણે છે કે એની આ સફળતાની પાછળ સંઘર્ષની અનેક વાત છુપાયેલી છે.

એકસોમી ટેસ્ટ રમવા ઊતરેલા ચેતેશ્વર પૂજારાને દેશના પહેલા ‘સેન્ચુરિયન’ સુનીલ ગાવસકર દ્વારા વિશેષ કૅપ એનાયત થઈ ત્યારે એનાં પિતા, પત્ની પૂજા અને પુત્રી પણ હાજર હતાં.

ગૂગલ સર્ચમાં એક ક્લિક કરવાથી ચેતેશ્વરની કરિયરનો આખો આંકડાકીય પ્રોફાઈલ મળી જશે, પણ એના જીવનમાં આવેલા પડકારો જાણવા હોય તો એના પરિવારના સભ્યો અને એની સાથે ક્રિકેટ રમનારા ખેલાડીઓને મળવું પડે.

ચેતેશ્વરના બન્ને પગમાં સર્જરી થઈ છે છતાં હિંમત હાર્યા વિના એ ક્રિકેટ રમતો રહ્યો અને દેશ વતી ૧૦૦મી ટેસ્ટ મૅચ રમીને એક મોટી સિદ્ધિ હાંસલ કરી. આ ગાળામાં એણે વિક્ટ સ્થિતિમાં વિકેટ પર અડીખમ ઊભા રહેવાની ક્ષમતાનું પ્રદર્શન કરી રાહુલ દ્રવિડ પછી ધ વૉલ તરીકે પણ નામ મેળવ્યું.