દર્દીની જિંદગી ઉજાળવાનું કામ કરે છે આ તબીબ

રાજકોટને કર્મભૂમિ બનાવી ચર્મરોગ નિષ્ણાત ડૉ. સુરેશ જોશીપુરાએ રાષ્ટ્રીય-આંતરરાષ્ટ્રીય સ્તરે ખ્યાતિ મેળવી છે. એક સેવાભાવી તબીબ હોવા ઉપરાંત ચર્મરોગો પરના એમના સંશોધનનો લાભ પણ એમના દર્દીઓને મળી રહ્યો છે.

પોરબંદરમાં વર્ષ ૧૯૫૩માં એક સામાન્ય પરિવારમાં જન્મ લઈને એક શિક્ષકના પુત્ર અને ચર્મરોગના નિષ્ણાત તબીબ ડૉ. સુરેશ જોશીપુરાએ માત્ર રાજકોટ, સૌરાષ્ટ્ર કે ગુજરાત જ નહીં, પરંતુ આંતરરાષ્ટ્રીય સ્તરે ખ્યાતિ મેળવીને ભારતનું ગૌરવ વધાર્યું છે.

પોરબંદરમાં પ્રાથમિક શિક્ષણ લઈને જામનગરમાં તબીબી શિક્ષણ મેળવ્યા બાદ એમણે રાજકોટને કર્મભૂમિ બનાવી. MD, DVD - PHD, FRCP (LONDON), IFAAD (USA) સહિતની ડિગ્રી ધરાવતા ડૉ. સુરેશ જોશીપુરાનું નામ આજે તબીબી જગત અને રાજકોટ-સૌરાષ્ટ્ર માટે અજાણ્યું નથી. શાંત અને પ્રતિભાશાળી જ નહીં, એક સેવાભાવી તબીબ તરીકે તેઓ જાણીતા છે. ડૉ. જોશીપુરાએ તબીબી વ્યવસાયને કમાણીના સાધન તરીકે અપનાવ્યો નથી, પરંતુ પોતાની આવડત અને અનુભવનો લાભ ગામડાંના ગરીબ દર્દીને પણ મળે એવા આશય સાથે તેઓ છેલ્લા ચાર દાયકા કરતાં વધુ સમયથી રાજકોટમાં તબીબી પ્રેક્ટિસ કરી રહ્યા છે.

રાજકોટમાં કોઈન્સ કૉર્નર, પહેલે માળે, યાજ્ઞિક રોડ ખાતે ૧૯૮૨માં ક્લિનિક શરૂ કરી તબીબી પ્રેક્ટિસ શરૂ કરી હતી એ વાતને આજે ૪૨ વર્ષ વીતી ગયાં. આજે જૈફવયે પણ એ નિયમિત ક્લિનિક પર આવી દર્દીઓનું નિદાન કરે છે. તેઓ માને છે કે મારા ચાર દાયકાના અનુભવનો નિચોડ જે છે એનો લાભ દર્દીઓને મળવો જોઈએ.

કોરોનાના કપરા કાળમાં વાહનવ્યવહારને અસર થઈ હતી ત્યારે પણ ગામડાંના દર્દીઓને કોઈ મુશ્કેલી ન પડે એ માટે ખાસ ડિજિટલ વ્યવસ્થા ઊભી કરીને દર્દીઓનું કન્સલ્ટિંગ કરીને માનવતાનું ઉત્તમ ઉદાહરણ પૂરું પાડ્યું હતું.

ડૉ. સુરેશ જોશીપુરાએ સંઘર્ષની સાથે સફળતા મેળવીને ઊગતી પેઢીને પ્રેરણા આપી છે. આજે મેડિકલ ફીલ્ડમાં તબીબો દર્દીઓને ખર્ચના ખાડામાં ઉતારી દેતા હોય છે ત્યારે ડૉ. જોશીપુરાએ દર્દીમાં હંમેશાં દરિદ્રનારાયણનાં દર્શન કર્યાં છે. દર્દી ઝડપથી સાજો થઈ જાય અને એને ઓછામાં ઓછો ખર્ચ થાય અને લાંબો સમય દવા ન લેવી પડે એની તકેદારી સાથે તબીબી પ્રેક્ટિસ કરી રહ્યા છે.

સૌરાષ્ટ્રભરમાંથી ચર્મરોગના દર્દીઓ એમની પાસે આવે છે. દર્દીઓ ક્યારેય નિરાશ ન થાય એને નજર સમક્ષ રાખીને તેઓ એક તબીબ તરીકે દાયકાઓથી કામ કરી રહ્યા છે.