પગરખાંના પ્રોબ્લેમ કેમ ઉકેલવા?

ચપ્પલ-બૂટ પહેરવાથી થતી અમુક સમસ્યાના ઉપાય છે એકદમ હાથવગા..

- વિશ્વા મોડાસિયા

આજકાલના આધુનિક યુગમાં કપડાંથી લઈને સ્ટાઈલિંગ સુધી માણસ વધુ સજાગ બનતો જાય છે. માથાથી માંડી પગ સુધી લોકોને સારી અને બ્રાન્ડેડ વસ્તુ જ જોઈએ છે. જો કે આવી વસ્તુ લેવા માટે ક્યારેક ઘરનું બજેટ પણ ખોરવાતું હોય છે. ઑફિસ કે કૉલેજમાં લોકો પોતાની ફૅશન સ્ટાઈલને આગવી રાખવા ખૂબ મહેનત કરતા હોય છે. લોકો પોતાની ફૅશન અને કપડાં બાબતે તો સજાગ છે, પરંતુ ઘણી વખત આ કપડાં અને ફૅશનને અલગ લુક આપતાં પગરખાંને ભૂલી જાય છે.

પગરખાંની વાત આવે ત્યારે આરામ અને ફૅશન એકસાથે આવે. કપડાં અને બીજાં આઉટવેરની જેમ ચપ્પલ પણ આરામદાયક ન હોય તો ઘણી સમસ્યાનો સામનો કરવો પડે. ભલે તમે હિલ્સ, ફ્લૅટ, સ્નિકર્સ અથવા બૂટ પહેરતાં હો, પરંતુ ફૂટવેર પસંદ કરતી વખતે અને પહેરતી વખતે કેટલીક ટિપ્સ ધ્યાનમાં રાખવી જોઈએ.

- તો, આ વખતે વાત ફૂટવેરને લગતી કેટલીક સમસ્યા અને એના ઈલાજની..

ચપ્પલ-બૂટ લેતી વખતે લોકો થોડા દિવસમાં પગરખાં ઢીલાં-લૂઝ થઈ જશે એમ વિચારી એક સાઈઝ નાની લેતા હોય છે, જેને કારણે એ પહેર્યા બાદ પગમાં દુખાવો કે ડંખ એટલે કે છાલા પડવાની સમસ્યા થાય છે. એનો ઈલાજ છેઃ નવાં ફૂટવેરને સ્ટ્રેચ કરવા માટે ઝિપ બૅગમાં પાણી ભરી એને પગરખાંની અંદર મૂકી ફ્રીઝરમાં રાખી દો. પાણીના વિસ્તરણને કારણે ફૂટવેર ખેંચાશે અને વધુ આરામદાયક બનશે.