કરોડપતિ કપાતરનાં કારનામાં

અમદાવાદમાં ધનિક પરિવારના નબીરાનાં બેફામ અને જોખમી કારડ્રાઈવિંગ લોકો માટે ઘાતક બન્યાં છે. એમની ઝડપની મજા નિર્દોષ નાગરિકો માટે મોતની સજા બની છે.

- મહેશ શાહ (અમદાવાદ)

વિસ્મય અને તથ્ય, બન્ને અમદાવાદના ધનિક અને વગદાર પિતાના પુત્ર. સામ્યતા ગણો તો બન્નેએ અમદાવાદમાં વૈભવી કાર ઓવરસ્પીડમાં ચલાવીને ગંભીર અકસ્માત સર્જ્યો અને રાહદારીઓને મોતને ઘાટ ઉતાર્યા. બન્નેના વગદાર પિતાએ એમના નબીરાનાં કરતૂતો છુપાવવા અનેક પ્રયાસ કર્યા. ઔર એક સમય એ પણ હતો કે બન્નેના પિતા સામે પણ અમુક ગુના નોંધાયેલા છે!

પહેલાં વાત વિસ્મય અમિત શાહની. આઈ સર્જ્યન ડૉ. અમિત શાહના પુત્ર વિસ્મયે ફેબ્રુઆરી, ૨૦૧૩માં અમદાવાદના જજીઝ બંગલો વિસ્તારમાં બીએમડબ્લ્યુ કાર ગફલતભરી ચલાવીને મધ્યમવર્ગી પરિવારના બાઈકસવાર શિવમ દવે અને રાહુલ પટેલનાં મોત નિપજાવ્યાં. આ બીએમડબ્લ્યુ હિટ ઍન્ડ રન કેસમાં વિસ્મય શાહે પાંચ વર્ષ જેલની સજા ભોગવી. એના પિતા સામે આર્થિક ગુનો નોંધાયેલો.

આ પછીથી આજ લગી અમદાવાદ સહિત ગુજરાતભરમાં ઘણા અકસ્માત થયા, એમાં અનેક નિર્દોષ લોકો મોતને ભેટ્યા. જો કે વગદાર બાપના બેટા વિસ્મય શાહે સર્જેલા અકસ્માતથી ચડે એવો ગંભીર અકસ્માત ગયા પખવાડિયે થયો. ૧૯ જુલાઈ, બુધવારે રાત્રે એકાદ વાગે અમદાવાદના ઈસ્કોન બ્રિજ પર વીસેક વર્ષના તથ્ય પ્રજ્ઞેશ પટેલે જેગુઆર કાર ઓવરસ્પીડમાં હંકારીને બ્રિજ પર ઊભેલા વીસેક લોકોને હવામાં ફંગોળ્યા. એમાં બે પોલીસ સહિત નવનાં મોત થયાં તો અમુકને ઈજા થઈ.

કમનસીબી ગણો તો આ અકસ્માત પહેલાં આ બ્રિજ પર હાર્દિક ઠાકોર નામના સગીર યુવકે એની કાર એક ડમ્પર સાથે ટકરાવેલી એટલે ત્યાં પોલીસજવાનો અને અમુક લોકો મદદ કરવા ઊભા હતા. એવામાં બે યુવતીઓ સહિત પાંચ મિત્રને જેગુઆર કારમાં બેસાડીને હાઈ વૉલ્યૂમ મ્યુઝિક વગાડતાં વગાડતાં મસ્તીભર્યા મૂડમાં કર્ણાવતી ક્લબના રસ્તેથી ઈસ્કોન બ્રિજ પર રમરમાટ નીકળેલા તથ્ય પટેલને બ્રિજ પર અકસ્માતગ્રસ્ત વાહન કે ટોળું દેખાયું નહીં અથવા કાર પર એનો કાબૂ ન રહ્યો એમાં કાર ટોળા પર ચઢવાથી નવનાં મોત થયાં. અમદાવાદમાં કાર અકસ્માતમાં આટલાં (નવ) મૃત્યુ થયાનો દાયકાનો આ પહેલો કેસ.

એક એક્સિડન્ટમાં ભોગ બનેલા લોકોને મદદ કરી રહેલા નવ રાહદારીઓ પોતે જ કંપારી છૂટી જાય એ રીતે બીજા અકસ્માતમાં મૃત્યુ પામ્યા.