જૂના ટીવીને આ રીતે બનાવો એન્ટરટેઈન્મેન્ટ પાવરહાઉસ

સ્ટ્રીમિંગ સ્ટિક, સ્ટ્રીમિંગ બૉક્સ અથવા ઍન્ડ્રોઈડ ટીવી બૉક્સ લગાવતાં જ તમારું ટીવી બની જશે એકદમ સ્માર્ટ.

- પુનીત આચાર્ય સોમપુરા

સપ્ટેમ્બર ૧૫, ૧૯૫૯: આ એ દિવસ છે જ્યારે આપણા દેશમાં ટીવીનું આગમન થયું. શરૂઆત એવી રીતે કરવામાં આવી કે સ્ટુડિયોમાં ન્યૂઝ અને કાર્યક્રમો રેકૉર્ડ કરવાના અને ત્યાંથી વાયા સેટેલાઈટ દેશનાં જુદાં જુદાં શહેરોમાં આવેલાં ટીવીસ્ટેશનોના ઊંચા ટાવરોનાં રિસેપ્ટર સુધી ટીવી સિગ્નલો પહોંચાડવાનાં. ટાવર ઉપર લાગેલાં ટ્રાન્સમીટર આ સિગ્નલોને બૂસ્ટ કરીને વહેતાં મૂકે એટલે તમારા ઘરની અગાસીમાં લગાડેલું ખાસ્સું ઊંચું ઍલ્યુમિનિયમની ભૂંગળીઓથી બનેલું એન્ટેના એને ઝીલી લે અને ટીવી સુધી પહોંચાડી દે. એ પણ જાણી લો કે ટીવી પ્રસારણની શરૂઆત કુલ એકવીસ (જી હા, ફક્ત ૨૧) ટીવીસેટ સાથે થઈ હતી!

વર્ષો વીત્યા બાદ નેવુંના દસકામાં ટેરેસ પર ડિશ એન્ટેના લગાડીને સેટેલાઈટથી ઘરમાં સીધી જ ટીવીચૅનલો જોઈ શકાય એવી સુવિધા આવી. આવ્યા ભેગી જ એકદમ ઝડપથી પૉપ્યુલર પણ થઈ ગઈ. કારણ એ હતું કે એમાં દેશ જ નહીં, પરંતુ વિદેશની અમુક ટીવીચૅનલોનો રસથાળ પણ મેળવી શકાતો હતો. જો કે આ વિકલ્પ થોડો મોંઘો હોવાથી સસ્તામાં વધુ ચૅનલો ઑફર કરતો કૅબલ ટીવી ઉદ્યોગ આપણા દેશમાં સારોએવો વિકસ્યો.