વામન કદ છતાં વિરાટ છલાંગ

ભગવાન વિષ્ણુના દસ અવતારમાંના એક વામન અવતારમાં વામન સ્વરૂપ ભગવાને ત્રણ ડગલાંમાં સમગ્ર બ્રહ્માંડને માપી લીધું હતું તો તળાજા નજીકના ગોરખી ગામના આ વામન કદ ગણેશે મક્કમ ડગલે પોતાને જોઈતું હતું એ મેળવી લીધું છે.

- જયેશ દવે (ભાવનગર)

વર્ષ ૨૦૧૯માં એમબીબીએસના અભ્યાસ માટેની પ્રવેશયાદી જાહેર થવાની હતી ત્યારે ભાવનગરની મેડિકલ કૉલેજની કુલ બેઠકમાંથી એક બેઠક પહેલેથી જ અનામત હતી. આ બેઠક પર સર્વોચ્ચ અદાલતના ચુકાદા સાથે માત્ર ત્રણ ફૂટની ઊંચાઈ, પરંતુ ખૂબ ઊંચે આંબવાની તાકાત અને સપનાં ધરાવતા ગણેશ બારૈયાએ પહેલેથી જ પોતાનો હક મેળવી લીધો હતો. અહીંથી શરૂ થઈ વિશ્વના સૌથી નાના કદના ડૉક્ટરની તબીબી અભ્યાસની યાત્રા.

આજે આ ડૉક્ટર અભ્યાસ પૂર્ણ કરી ઈન્ટર્નશિપ સાથે અનુભવ મેળવી રહ્યો છે અને હજી તબીબી ક્ષેત્રે પોસ્ટ ગ્રેજ્યુએશનમાં પ્રવેશ મેળવી પિડિયાટ્રી, ડર્મેટોલૉજી કે સાઈકિયાટ્રીમાં નિષ્ણાત બનવા માગે છે. ભાવનગર જિલ્લાના તળાજા નજીકના નાનકડા ગોરખી ગામના ગણેશ બારૈયાની વામન કદ છતાં વિરાટ છલાંગથી હવે લોકો પરિચિત છે, પણ આજે વાત આ વિરાટ છલાંગ પાછળની સંઘર્ષયાત્રા અને કેટલીક અજાણી બાબતની કરવી છે.

ખેતમજૂર વિક્રમભાઈ અને દેવુબહેન બારૈયાનું આઠમું સંતાન આ ગણેશ. કુલ નવ ભાઈ–બહેનનો પરિવાર. સાત મોટી બહેન, એ પછી ગણેશ અને એનાથી પણ એક નાનો ભાઈ. આમ ગણેશ સાત બહેનોનો ખોટનો ભાઈ, પરંતુ કુદરતે એને વામન કદની ખોટ આપીને મોકલ્યો હતો. જો કે ગણેશ પોતાના નામ મુજબ જ પોતાની શારીરિક મર્યાદાઓને બદલે શક્તિ અને ધ્યેય માટે પ્રતિબદ્ધ હતો.

ખેતમજૂરી કરતા પિતાની ઈચ્છા હતી કે મારો ગણેશ ભણે. ગોરખીની પ્રાથમિક શાળામાં ગણેશે પ્રવેશ મેળવ્યો. કદ નાનું એટલે શાળાએ ચાલીને પહોંચવું અઘરું થઈ જાય, પણ બહેનો પોતાના ભાઈને તેડી લઈને શાળાએ લઈ કારણે જાય, નબળી આર્થિક પરિસ્થિતિને કારણે પ્રાથમિક શાળા પછી બહેનોને અભ્યાસ પર પૂર્ણવિરામ મુકાઈ ગયું ત્યારે ગણેશ માટે વિકટ પરિસ્થિતિ શરૂ થઈ.