માતા-પુત્રીના માધ્યમથી હજારો ઘરમાં ગુંજી કિલકારી

માના સંઘર્ષને પોતાનો સંઘર્ષ બનાવી દીકરીએ એની જેમ સફળતાની કેડી કંડારી... અને હવે સેવા તથા સ્વાસ્થ્ય-સમજણ માટે પણ એ જ રસ્તો અપનાવ્યો છે.

વારસો... આ શબ્દ સાંભળતાં જ પુત્ર, પિતા, દાદા, પરદાદા આ બધા સંબંધ માનસપટ પરથી પસાર થઈ જાય. એનો મતલબ એ કે વારસો સીધો પુરુષસંબંધ સાથે જોડાયેલો એવું કહી શકાય, પણ હવે આધુનિક સમયમાં વારસો એ સીમિત અર્થમાં રહ્યો નથી. માતાનો વારસો દીકરી પણ સારી રીતે આગળ લઈ જાય છે. મધર્સ ડે નિમિત્તે એક એવા વારસાની વાત અહીં કરવી છે. સુરતનાં ગાયનેક માતા-પુત્રી થકી હજારો ઘરમાં કિલકારી ગુંજી છે. આ માતા-પુત્રીની જોડીએ મળીને ૭૦ હજાર જેટલાં બાળકોની પ્રસૂતિ કરાવી છે.

સિત્તેર-એંસીનો દાયકો છે... સુરતના એક થિયેટરમાં સુપરસ્ટાર રાજેશ ખન્નાની ફિલ્મ ચાલી રહી છે. હીરો-હીરોઈન વચ્ચેના રોમાન્સનો સીન આવે છે ત્યાં અચાનક ફિલ્મ સ્ટૉપ થઈ જાય છે... કાકા એટલે કે રાજેશ ખન્નાના ચહેરા પર એક સ્લાઈડ દેખાય છે, જેમાં લખ્યું છેઃ ડૉ. માલતીબહેન શાહ તત્કાલ થિયેટર બહાર આવે..

અને પછી માલતીબહેન પરિવારના બીજા સભ્યોને થિયેટરમાં જ છોડીને સીધાં રિક્ષા પકડી હૉસ્પિટલ પહોંચે છે અને પ્રસૂતાની ડિલિવરી કરે છે. આવી ઘટના તો કંઈકેટલીય વાર બની છે. એ સમયે પુરાણા સુરતમાં પ્રસૂતિ માટે મહિલાઓનું પસંદગીનું પહેલું નામ હતુંઃ ડૉ. માલતી શાહ. અત્યારે એમની ઉંમર ૮૨ વર્ષની છે. પ્રેક્ટિસ તો છ વર્ષથી છોડી દીધી છે, પણ નિવૃત્તિના જીવનમાં પણ સેવાકીય પ્રવૃત્તિ ચાલુ રાખી છે. માલતીબહેન અઠવાડિયામાં એક દિવસ હૉસ્પિટલ આવે છે, મહિલા દરદીઓને મળે છે અને ફ્રી કૅન્સર કાઉન્સેલિંગ કરે છે. કૅન્સર એટલા માટે કે હમણાં, સાત વર્ષ અગાઉ એમણે પોતે જ કૅન્સરને માત આપી છે.