સરકાર મારી... તો લગામ પણ મારી જ ને!

નવી સરકારની રચના પહેલાં નીતિશ કુમાર અને ચંદ્રાબાબુ નાયડુ વડા પ્રધાન નરેન્દ્ર મોદીનું નાક દબાવશે એવી શક્યતા વ્યક્ત થતી હતી, પરંતુ મોદીએ એમની માગણી અને મહત્ત્વાકાંક્ષા પર લગામ તાણી દીધી છે. પ્રધાનમંડળમાં સંખ્યાબળથી માંડી ખાતાંની ફાળવણીમાં પણ મોદીએ એમની કારી ફાવવા દીધી નથી.

- હીરેન મહેતા

રાજકીય વર્તુળોમાં જેટલો ગણગણાટ હતો એના કરતાં ઘણી સરળતાથી નરેન્દ્ર મોદીની ત્રીજી વારની સરકાર સત્તારૂઢ થઈ ગઈ છે અને મોદીએ એમની આદત પ્રમાણે વડા પ્રધાનપદ સંભાળતાંની સાથે જ અઢી મહિનાથી ચૂંટણીની આચારસંહિતાને કારણે સુષુપ્ત થઈ પડેલા પ્રશાસનતંત્રને ચાબુક મારી ફરી દોડતું પણ કરી દીધું છે.

ગયા મંગળવારે ચૂંટણીનાં પરિણામ જાહેર થતાં ગયાં અને ભાજપ પોતે સ્પષ્ટ બહુમતથી છેટે રહી જશે એ સાફ થયું ત્યારથી મોદીએ વડા પ્રધાન તરીકેની એમની ત્રીજી મુદતમાં વિશેષ તો તેલુગુ દેશમના ચંદ્રાબાબુ નાયડુ (લોકસભામાં ૧૬ બેઠક) અને જનતા દળ-યુનાઈટેડના નીતિશ કુમાર (લોકસભામાં ૧૨ બેઠક)ના ઓશિયાળા બનીને રહેવું પડશે એવી ચર્ચા હતી. આખરે તો એમની સરકારનું અસ્તિત્વ આ બે મોટા સાથી પક્ષો પર અવલંબિત છે. આ બન્ને પક્ષોની અપેક્ષા (ખરેખર તો માગણી)ની યાદી બહુ મોટી હતી. રાજકારણમાં આમેય નાક દબાવવાના મોકા કોઈ છોડતું નથી. એ હિસાબે આ બન્ને પક્ષે પ્રધાનમંડળમાં મોટા સહભાગની માગણી કરી હતી. રાજકારણના ખેલમાં બોલ્યા વગર પણ ઘણા સંકેત આપવામાં આવે છે. મોદી પોતાની માગણી નહીં સ્વીકારે તો ભાજપ સાથે છેડો ફાડવા સુધીની નોબત આવી શકે એવા ઈશારા આપવામાં આવ્યા હોય એવી પણ ભારોભાર શક્યતા છે.

હાથ જોડ્યા, પણ હાથ ઉપર રાખ્યા: નરેન્દ્ર મોદીએ ભાજપના મોટા ભાગના મંત્રીઓનાં ખાતાં જાળવી રાખવામાં પણ સફળતા મેળવી.