ઈસ્ટ યા વેસ્ટ, ઈન્વેસ્ટમેન્ટ માટે ઈન્ડિયા ઈઝ બેસ્ટ...

વિદેશી ઈન્વેસ્ટર્સ શા માટે ભારતીય માર્કેટમાં એમનું રોકાણ વધારી રહ્યા છે? એનો જવાબ ભારતીય રોકાણકારોએ ખાસ જાણવો જોઈએ. વૈશ્વિક પરિબળો પણ ચોક્કસ સંકેત આપતાં રહ્યાં છે. આ જવાબની કેટલીક પાયાની બાબત સમજીએ...

- જયેશ ચિતલિયા

વિશ્વના વિવિધ દેશોની આર્થિક સમસ્યા કંઈ પણ હોય, એમાંથી અનેક દેશના ઈન્વેસ્ટર્સ ભારતીય અર્થતંત્રને મજબૂત અને વિકાસલક્ષી માનતા હોવાથી ભારતીય કૅપિટલ માર્કેટમાં એમનું રોકાણ સતત આવી રહ્યું છે. શૅરબજાર તેમ જ આઈપીઓ (ઈનિશિયલ પબ્લિક ઑફરિંગ્સ)માં ફોરેન પોર્ટફોલિયો ઈન્વેસ્ટર્સ (એફપીઆઈ)નો રોકાણપ્રવાહ અવિરત રહ્યો છે. અલબત્ત, એમની વેચવાલી પર અહીં માર્કેટ ઘટે યા તૂટે પણ છે, પરંતુ મોટે ભાગે એમનું રોકાણ આપણી જ માર્કેટમાં વધુ પ્રમાણમાં પાછું ફરે છે. એટલે જ આ કારણે લાંબા સમય સુધી તેજીની ગાડી પાટા પરથી ઊતરે એવું લાગતું નથી. હા, ક્યારેક બ્રેક લાગી શકે અથવા ગાડી ધીમી પડી શકે.

આ રહ્યાં કારણ અને આંકડા

એફપીઆઈ શા માટે ભારતીય માર્કેટમાં રોકાણ કરે છે એનાં કારણો ઘણાં છે. ભારતીય અર્થતંત્રની મજબૂતી તરફ આગેકૂચ, વિશ્વની ફાસ્ટેસ્ટ ગ્રોઈંગ ઈકોનોમી, વિકાસલક્ષી પગલાં-સુધારા, ઈન્ફ્રાસ્ટ્રક્ચરનો વિકાસ, વિશાળ વસતિને કારણે કન્ઝમ્પશન (વપરાશ) માટે વિરાટ માર્કેટ, યુવાબળ, નવા બિઝનેસ માટે ભરપૂર તક, કરન્સીનું યોગ્ય નિયમન, ફુગાવા અને વ્યાજદરનું વાજબી સંચાલન, વગેરેનો એમાં સમાવેશ થાય છે.