ટ્રમ્પભાઈ આવ્યા... જગતઆખા માટે ટેન્શન લાવ્યા!

અમેરિકાના પ્રમુખપદે ફરી ડોનાલ્ડ ટ્રમ્પ ચૂંટાઈ આવ્યા એ સમાચારથી ઘણા લોકોને ટાઢિયો તાવ આવી ગયો છે. અમેરિકાની વર્ષોથી ચાલી આવતી નીતિ બદલવાનો ઈશારો કરી ટ્રમ્પે આવી રહેલાં તોફાનની એંધાણી પણ આપી દીધી છે.

- હીરેન મહેતા

માથાફરેલ આગેવાન તરીકે પંકાઈ ગયેલા ડોનાલ્ડ ટ્રમ્પ મહિના ઓછા સમયમાં ફરી અમેરિકી પ્રમુખ તરીકે શપથ લેશે. ટ્રમ્પ અને એમનાં હરીફ ઉમેદવાર ડેમોક્રેટિક પાર્ટીનાં કમલા હેરિસ વચ્ચે ચૂંટણીમાં ભારે ચડસાચડસી થશે એવી અટકળથી વિપરીત ટ્રમ્પ અનેક ધારણાને વટાવી સારીએવી સરસાઈથી ચૂંટણી જીત્યા. પરંપરાગત રીતે ડેમોક્રેટિક પાર્ટી જીતતી હોય એવાં કેટલાંક રાજ્યો પણ આ વખતે ટ્રમ્પની તરફેણમાં ગયાં. સાથોસાથ અમેરિકી સંસદના નીચલા ગૃહ (હાઉસ ઑફ રિપ્રેઝન્ટેટિવ્સ) માટે થયેલા મતદાનનાં અત્યાર સુધીનાં પરિણામ પણ ટ્રમ્પની રિપબ્લિકન પાર્ટીની બહુમતી સૂચવી રહ્યાં છે તો હમણાંની દ્વિવાર્ષિક ચૂંટણી પછી સંસદના ઉપલા ગૃહ (સેનેટ)માં પણ ટ્રમ્પના પક્ષે બહુમત મેળવી લીધો છે.

ભારત કરતાં અમેરિકાની ચૂંટણી અલગ છે. ત્યાં મતદારો એમના સંસદસભ્યો ચૂંટવાની સાથોસાથ પ્રમુખ માટે પણ અલગથી વોટ કરે છે. પાછલાં વર્ષોમાં બહુ ઓછી વાર બન્યું છે કે અમેરિકી · પ્રમુખ જે પક્ષનો હોય એ જ પક્ષ એની સંસદનાં બન્ને ગૃહમાં સરસાઈ ધરાવતો હોય. આવી સ્થિતિમાં પ્રમુખ માટે નીતિ ઘડવાથી માંડી અનેક કામ સરળ થઈ જાય. ટ્રમ્પ તો આમ પણ પોતાનું ધાર્યું કરવા ટેવાયેલા છે અને અનેક બાબતમાં જક્કી વલણ લેવા માટેય જાણીતા છે. દુનિયાનાં ઘણાંખરાં મહાનગર જેમ અલગ અલગ ખૂણેથી આવી વસેલા લોકોથી ભર્યાં હોય એમ અમેરિકા તો આખો દેશ નોખી નોખી સંસ્કૃતિ અને નોખી નોખી ભૌગોલિક ઓળખવાળા લોકોથી બન્યો છે. આવા લાખો વસાહતીઓએ અમેરિકાને એમનું વતન બનાવ્યું છે અને એક ઉદાર મિજાજી રાષ્ટ્ર તરીકેની એની છાપ પણ આ ઓળખને કારણે જ છે.