ഷംസീറും അറബിയും പിന്നെ ഖുബൂസും

എല്ലാം സഹിച്ച് വീട്ടിലെ ബുദ്ധിമുട്ടുകളെക്കുറിച്ചാലോചിച്ച് ഷംസീർ ഒരടിമയെപ്പോലെ പണിയെടുത്തു

- ശശി താഴെക്കാട്

വീട്ടിലെ പ്രാരാബ്ധങ്ങൾക്ക് അറുതിവരുത്താനാണ് ഏതൊരു സാധാരണ മലയാളിയെപ്പോലെ നൂറുനൂറ് സ്വപ്നങ്ങളുമായി ഗൾഫ് എന്ന സ്വപ്നലോകത്ത് ഷംസീറും കാലുകുത്തിയത്. അവിടെ എത്തിയപ്പോൾ കിട്ടിയതാകട്ടെ ഒരു അറബിയുടെ വീട്ടിലെ തൂപ്പുകാരന്റെ ജോലിയും. എന്ത് ജോലിയും ചെയ്യാൻ തയ്യാറായി വന്ന ഷംസീറിന് താങ്ങാവുന്നതിനപ്പുറമായിരുന്നു അറബിയുടെ വീട്ടിലെ ജോലി. കിലുക്കം സിനിമയിൽ ജഡ്ജിയേമാൻ കിട്ടുണ്ണിയെ ഇട്ട് ചാടിക്കുന്നതു പോലെ ആസനം താഴെ കുത്താൻ സമയം കിട്ടാത്ത തരത്തിൽ അറബി ഷംസീറിനെക്കൊണ്ട് പണിയെടുപ്പിച്ചു.

എല്ലാം സഹിച്ച് വീട്ടിലെ ബുദ്ധിമുട്ടുകളെക്കുറിച്ചാലോചിച്ച് ഷംസീർ ഒരടിമയെപ്പോലെ പണിയെടുത്തു. ശരിയായിട്ടൊന്ന് കുളിക്കാനോ, മര്യാദയ്ക്കൊന്ന് ഉറങ്ങാനോ ഷംസീറിന് കഴിഞ്ഞിരുന്നില്ല. സദാസമയവും അറബി കൂടെ നിന്ന് ഓരോന്ന് ചെയ്യിച്ചുകൊണ്ടിരിക്കും. അതൊക്കെ പോട്ടെന്ന് വയ്ക്കാം. മര്യാദയ്ക്ക് ഭക്ഷണം പോലും അറബി കൊടുത്തിരുന്നില്ല.