கலியுக வைகுண்டத்திற்குள் நுழைந்த மீன், பன்றி, மாட்டின் கொழுப்புகள்

ஏழுமலையான் நெய்வேத்தியத்திற்கு வந்த நெய்யில் கலப்படம்

சர்ச்சைக்குள்ளான திருப்பதி லட்டு விவகாரம் தோஷ நிவர்த்தி பரிகார பூஜைகளுக்கு ஏற்பாடு

கலியுக வைகுண்டமாக விளங்கும் திருப்பதியில் ஏழுமலையானுக்கு படைக்கும் நெய்வேத்தியம் மற்றும் லட்டு பிரசாதத்துக்கான நெய்யில் மீன், பன்றி, மாட்டின் கொழுப்புகள் கலந்திருந்த சம்பவம் சர்ச்சையை ஏற்படுத்திய நிலையில், தோஷ நிவர்த்தி பூஜைகளுக்கு ஏற்பாடுகள் செய்யப்பட்டு வருகிறது.

உலக பிரசித்தி பெற்ற திருப்பதி ஏழுமலையான் கோயில் கலியுக வைகுண்டமாக விளங்கி வருகிறது. இதில் திருப்பதி என்றாலே அனைவருக்கும் நினைவுக்கு வருவது ஏழுமலையானின் லட்டு பிரசாதம் தான். தினமும் சுவாமி தரிசனத்திற்கு வரக்கூடிய பல்லாயிரக்கணக்கான பக்தர்கள் தங்களது நண்பர்கள், சுற்றுப்புறத்தில் உள்ளவர்கள் மற்றும் உறவினர்களுக்கும் கூடுதலாக லட்டு பிரசாதம் வாங்கி செல்கின்றனர். இதற்காக திருமலை திருப்பதி தேவஸ்தானம் சார்பில் தினந்தோறும் 3.5 லட்சம் லட்டுகள் தயார் செய்யப்படுகிறது. இதில் சுவாமி தரிசனம் செய்யும் பக்தர்கள் ஒவ்வொருவருக்கும் ஒரு லட்டு இலவசமாக வழங்க கூடிய நிலையில், கூடுதல் லட்டு ஒன்று ரூ.50க்கு விற்பனை செய்யப்படுகிறது. அவ்வாறு மாதந்தோறும் 1 கோடிக்கு மேல் லட்டுகள் விற்பனை செய்யப்படுகிறது. தேவஸ்தான நிர்வாகம் லட்டு பிரசாதம், சுவாமிக்கு படைக்கும் நெய்வேத்தியம், திருச்சானூர் கோயிலுக்கு பிரசாதம் என ஒரு நாளைக்கு 15 ஆயிரம் கிலோ நெய் பயன்படுத்தப்படுகிறது.

அதன்படி ஆண்டுக்கு ரூ.260 கோடிக்கு மேல் நெய் கொள்முதல் செய்யப்பட்டு பிரசாதம் தயார் செய்யப்படுகிறது. இந்த நெய் கொள்முதல் டெண்டர் விடப்பட்டு தேவஸ்தான நிபந்தனைக்கு உட்பட்டு தர முன்வரும் நிறுவனத்திற்கு வழங்கப்படுகிறது. அவ்வாறு 5 நிறுவனத்திடம் இருந்து நெய் கொள்முதல் செய்யப்பட்டு வந்தது. இந்நிலையில் பக்தர்களிடம் இருந்து லட்டு பிரசாதம் தரம், சுவை இல்லை என குற்றச்சாட்டுகள் எழுந்தது. தற்போது ஆந்திராவில் ஆட்சி மாற்றம் ஏற்பட்டு முதல்வர் சந்திரபாபு நாயுடு முதல்வராக பொறுப்பேற்ற நிலையில், திருப்பதி தேவஸ்தானத்தில் புதிதாக பொறுப்பேற்ற செயல் அதிகாரி ஷியாமளா ராவ் லட்டு பிரசாதம் தரம் உயர்த்துவதற்காக கமிட்டி ஏற்பாடு செய்தார்.