அரசு எடுக்கும் முயற்சிகளுக்கு தன்னார்வ அமைப்புகளும், சமுதாயமும் ஒத்துழைக்க வேண்டும்

புதுவையில் சர்வதேச மாற்றுத் திறனாளிகள் தின விழா நடந்தது.

இதில் துணைநிலை ஆளுநர் கைலாஷ்நாதன் கலந்துகொண்டு பேசியது, இந்த விழாவில் கலந்து கொள்வதில் மகிழ்ச்சி அடைகிறேன். ஏனென்றால் இந்த விழா, உடல் குறைபாடு உள்ளவர்களை குறைத்து மதிப்பிடும் சமுதாயத் தடைகளை உடைத்து எறியும் விழா. எல்லாரையும் போல குறைபாடு உள்ளவர்களும் எல்லா உரிமைகளோடு வாழத் தகுதியானவர்கள் என்று வெற்றி முழக்கம் இடும் விழா.

இந்த உலகம் எல்லாருக்கும் பொதுவானது என்று எடுத்துச் சொல்லும் விழா. குறைபாடு உள்ளவர்களின் கண்ணியத்தை, திறமையை, பெருமைப்படுத்த வேண்டும் என்ற தார்மீக பொறுப்பை உணர்த்தும் விழா. உடல் குறைபாடு உள்ளவர்களின் வாழ்க்கையை வளமாக்க மத்திய, மாநில அரசுகள் பல நலத்திட்டங்களை செயல்படுத்தி வருகின்றன. இந்த நலத்திட்டங்கள் எல்லாம் அவர்கள் சுயசார்போடும் சுயமரியாதையோடும் வாழ்க்கையை அமைத்துக் கொள்ள உதவியாக இருக்கிறது என்பதை நாம் பார்த்து வருகிறோம்.