തുടങ്ങി തൂക്കിയടി

കേരള ക്രിക്കറ്റ് ലീഗ്: ആദ്യ മത്സരത്തിൽ തൃശൂർ ടൈറ്റൻസിനെ അഞ്ചു വിക്കറ്റിന് തകർത്ത് ആലപ്പി റിപ്പിൾസ്

- അനിരു അശോകൻ

തിരുവനന്തപുരം: കളിമൺപിച്ചിൽ കുത്തിപ്പൊങ്ങിയ ആവേശത്തെയും ഗാലറികൾക്ക് മുകളിലൂടെ മൂളിപ്പറന്ന പന്തുകളെയും സാക്ഷിയാക്കി പ്രഥമ കേരള ക്രിക്കറ്റ്ലീഗിന് (കെ.സി.എൽ) ഗ്രീൻഫീഡിൽ ആവേശോജ്ജ്വല തുടക്കം. ഉദ്ഘാടന മത്സരത്തിൽ വെടിക്കെട്ട് ടീമുമായി എത്തിയ തൃശൂർ ടൈറ്റൻസിനെ 20 ഓവറിനുള്ളിൽ തുഴഞ്ഞെറിഞ്ഞ് ആലപ്പി റിപ്പി ൾസ് ആദ്യ വിജയം സ്വന്തമാക്കി.

തൃശൂർ ടൈറ്റൻസിനെ അഞ്ച് വിക്കറ്റിനാണ് ആലപ്പുഴക്കാർ മുക്കിയത്. ക്യാപ്റ്റൻ മുഹമ്മദ് അസ്ഹറുദ്ദീന്റെ വെടിക്കെട്ട് ബാറ്റിങ്ങാണ് റിപ്പിൾസിന്റെ ജയത്തിൽ നിർണായകമായത്. 47 പന്തുകൾ നേരിട്ട അസ്ഹറുദ്ദീൻ ഒമ്പത് സിക്സിന്റെയും മൂന്ന് ഫോറിന്റെയും അകമ്പടിയോടെയായിരുന്നു 92 റൺസ് അടിച്ചുകൂട്ടിയത്. സ്കോർ തൃശൂർ ടൈറ്റൻസ് 20 ഓവറിൽ എട്ട് വിക്കറ്റ് നഷ്ടത്തിൽ 161 റൺസ്. ആലപ്പി റിപ്പിൾസ് 18.3 ഓവറിൽ അഞ്ചിന് 163.