ഇടിച്ചിട്ട് കടന്ന കാർ ഒമ്പതു മാസത്തിനുശേഷം കസ്റ്റഡിയിൽ

മുത്തശ്ശി മരിച്ചു, ദൃഷാന അബോധാവസ്ഥയിൽ

വടകര: ദേശീയപാതയിൽ കാറിടിച്ച് വയോധിക മരിക്കുകയും കൊച്ചുമകൾ ഗുരുതര പരിക്കേറ്റ് അബോധാവസ്ഥയിൽ ആവുകയും ചെയ്ത സംഭവത്തിൽ പ്രതിയെ തിരിച്ചറിഞ്ഞു. കുടുംബത്തോടൊപ്പം വടകരയിലെ വിനോദസഞ്ചാര കേന്ദ്രങ്ങൾ സന്ദർശിച്ച് മടങ്ങുന്നതിനിടെ ഒമ്പതുകാരിയെയും മുത്തശ്ശിയെയും ഇടിച്ചിട്ട് ഊടുവഴികളിലൂടെ കടന്നുകളഞ്ഞ കാറിന്റെ ഉടമയെയാണ് ഒമ്പത് മാസങ്ങൾക്കുശേഷം പഴുതടച്ച അന്വേഷണത്തലൂടെ പൊലീസ് തിരിച്ചറിഞ്ഞത്. കാർ കസ്റ്റഡിയിലെടുത്തു. പുറമേരി സ്വദേശി മീത്തലെ പുനത്തിൽ ഷെജീലിന്റെ (35) KL18 R 1846 മാരുതി സ്വിഫ്റ്റ് കാറാണ് ഇരുവരെയും ഇടിച്ചുതെറിപ്പിച്ചതെന്ന് ക്രൈം ബ്രാഞ്ച് അന്വേഷണത്തിൽ കണ്ടെത്തി. സംഭവശേഷം വിദേശത്തേക്ക് രക്ഷപ്പെട്ട ഷെജീൽ ദുബൈയിലാണുള്ളത്.