'பைக்'கில் துணிச்சலுடன் வலம் வந்து சென்னையில் 7 இடங்களில் சங்கிலி பறித்த உ.பி. கொள்ளையர்கள்!

ஒரு மணி நேரத்தில் விமானத்தில் தப்பிய 2 பேரை போலீசார் கைது செய்தனர்!!

- 

பைக்கில் துணிச்சலுடன் வந்து சென்னையில் 7 இடங்களில் வலம் சங்கிலி பறித்துவிட்டு ஒரு மணி நேரத்தில் விமானத்தில் தப்பிய உ.பி. கொள்ளையர்கள் 2 பேரை போலீசார் கைது செய்தனர்.

சென்னையில் இன்று காலை நடந்த பரபரப்பான சம்பவம் பற்றிய விவரம் வருமாறு: சென்னையில் இன்று காலை பொழுது புலர்ந்தது.

சூரியன் உதித்ததும் மக்கள் தங்களின் அன்றாட வாழ்க்கையை தொடங்கினார்கள்.

வாக்கிங் மற்றும் ஜாக்கிங் செல்வோர் மற்றும் காலை யிலேயே வேலைக்குச் செல்லும் பெண்கள் என அவரவர் தங்கள் பணிகளில் தீவிரமாயினர்.

இந்நிலையில் இன்று காலை 6 மணியளவில் சைதாப்பேட்டை, வேளச்சேரி, திருவான்மியூர், அடையாறு, பெசன்ட் நகர், சாஸ்திரி நகர் உள்ளிட்ட இடங்களில் பரபரப்பு நிலவியது. அதாவது பைக்கில் (மோட்டார் சைக்கிளில்) ஹெல்மெட் அணிந்து வந்த 2 நபர்கள் வாக்கிங் சென்ற பெண்கள் மற்றும் பணிக்கு சென்ற பெண்களின் கழுத்தில் அணிந்திருந்த தங்கச் சங்கிலியை கொண்டு மின்னல் வேகத்தில் மறைந்தனர்.

திருவான்மியூர் இந்திரா நகர் பகுதியில் லட்சுமி என்ற பெண் வேலைக்கு சென்று கொண்டிருந்தார். அவரை பைக்கில் பின்தொடர்ந்து வந்த ஹெல்மெட் கொள்ளையர்கள் அவர் கழுத்தில் அணிந்திருந்த 5 பவுன் தங்கச் சங்கிலியை பறித்துச் சென்றனர்.

சாஸ்திரி நகர் பகுதியில் அம்புஜம் என்கிற மூதாட்டி இன்று காலை நடை பயிற்சி சென்று கொண்டிருந்தார். அவரிடம் அரை பவுன் தங்கச் சங்கிலி பறிக்கப்பட்டது.

மேலும், கிண்டி எம்.ஆர்.சி. மைதானம் அருகே நடை பயிற்சி மேற்கொண்டிருந்த நிர்மலா என்கிற மூதாட்டியிடம் தங்கச் சங்கிலி பறிப்பு அரங்கேறியது.