பா.ஜ.க.வுடன் கூட்டணியா? எடப்பாடி பழனிசாமி திடீர் டெல்லி பயணம்!

எஸ்.பி. வேலுமணியும் அடுத்து செல்கிறார்!!

- 

அ.தி.மு.க. பொதுச் செயலாளர் எடப்பாடி பழனிசாமி இன்று திடீரென டெல்லிக்கு பயணம் ஆனார்.

அவர், பா.ஜ.க.வுடன் தொடர்புடைய முக்கிய தலைவர்களை சந்தித்து பேசுவார் என கூறப்படுகிறது. இன்று இந்த நிலையில் மாலை எஸ்.பி. வேலுமணியும் டெல்லிக்கு செல்கிறார்.

பாரதிய ஜனதா கட்சியுடன் அ.தி.மு.க. உறவில் இருந்தது. ஆனால், பாராளுமன்ற தேர்தலுக்கு முன்னர் பா.ஜ.க.வுடன் உள்ள உறவை அ.தி.மு.க. முறித்துக்கொண்டது.

அடுத்த ஆண்டு நடைபெறவுள்ள சட்டமன்ற தேர்தல்மட்டுமல்லாது, இனி எக்காலத்திலும் அக்கட்சியுடன் கூட்டணி கிடையாது என எடப்பாடி பழனிசாமியும், சில தலைவர்களும் தெரிவித்துவந்தார்கள்.

ஆனால், தற்போது அரசியல் சூழ்நிலை மாறிவிட்டது. நடிகர் விஜயும் கட்சித் தொடங்கிவிட்டார். அவர் அ.தி.மு.க.வுடன் கூட்டணி வைக்கலாம் என கருத்து எழுந்தது. ஆனால், விஜய் தனித்தே போட்டியிடுவார் என அவரது அரசியல் ஆலோசகர் பிரசாந்த் கிஷோர் கூறிவிட்டார்.

ஆகவே, பலமான தி.மு.க. கூட்டணியை எதிர்க்க அ.தி.மு.க.வுக்கும் பலமான கூட்டணி தேவைப்படுகிறது. ஆனால், தற்போதைய நிலையில் அ.தி.மு.க.க்கு உடன்படும் கட்சிகள் இல்லை. எனவே, மீண்டும் பா.ஜ.க. அணியுடன் சேர அ.தி.மு.க. தலைவர்கள் விரும்புவதாக கூறப்படுகிறது.