વહેલી સવારથી જ ગાઢ અંધકાર સાથે મેઘમહેર આખો દિવસ હળવાં ઝાપટાં ચાલુ રહેવાની આગાહી

૨૨ જુલાઈથી ગુજરાતમાં ભારેથી અતિભારે વરસાદનો બીજો રાઉન્ડ શરૂ થવાની આગાહી

અમદાવાદ, મંગળવાર

આજે સવારથી શહેરના વાતાવરણમાં ફરી પલટો આવ્યો છે. આજે વહેલી સવારથી કાળાં ડિબાંગ વાદળ ગોરંભાયાં છે. ગઈ કાલે આખો દિવસ અસહ્ય બફારાથી લોકો હેરાન-પરેશાન હતા ત્યારે આજે સવારથી જ મેઘમહેર થવાથી વાતાવરણમાં સવારથી ઠંડક પ્રસરી છે. ઠેકઠેકાણે ઝરમરિયો વરસાદ પડી રહ્યો છે. ક્યાંક ઝરમર તો ક્યાંક વરસાદી ઝાપટાં પડી રહ્યાં છે. ઓફિસ કેવી રીતે પહોંચાશે કે પછી જોરદાર અંધારેલા વરસાદમાં બાળકોને સ્કૂલે મોકલવાં કે કેમ એવી દુવિધામાં લોકો આવી ગયા છે. આજે આખો દિવસ અમદાવાદ અને ગાંધીનગરમાં હળવાં ઝાપટાં ચાલુ રહેવાની આગાહી કરવામાં આવી છે. માત્ર અમદાવાદ જ નહીં, બોડેલીમાં સવારમાં જ બે કલાકમાં બે ઈંચ વરસાદ પડ્યો છે તો અરવલ્લી, શામળાજી, સુરત વગેરેમાં સવારથી ધીમી ધારે વરસાદ ચાલુ રહ્યો છે. શામળાજીમાં એક કલાકમાં બે ઈંચ વરસાદ વરસી ચૂક્યો છે, જેના કારણે મંદિર તરફ જવાના રસ્તામાં બે ફૂટ પાણી ભરાયાં છે.