અમદાવાદી આઈડિયાઃ વાહનો ડૂબે નહીં તે માટે સંબંધીઓના ઘરનો સહારો લીધો

બેઝમેન્ટમાં પાણી ભરાઈ જવાની સમસ્યાને કારણે અનેક લોકો ઊંચાણવાળા વિસ્તારમાં રહેતા સંબંધીઓના ઘરે વાહનો મૂકી આવ્યા

અમદાવાદ, સોમવાર

અમદાવાદ સહિત સમગ્ર ગુજરાતમાં આકાશી આફત ચારે તરફ વરસી રહી છે, જેના પગલે એનડીઆરએફની ટીમ પણ તહેનાત કરી દેવામાં આવી છે. અમદાવાદમાં શનિવારે અને રવિવારે વરસાદે કરેલી તોફાની બેટિંગમાં ઠેરઠેર પાણી ભરાઇ જવાના બનાવો બન્યા હતા. ચારેય દિશામાં થયેલા જળબંબાકારના લીધે હજારો ટુ વ્હીલર અને કારને નુકસાન થયું છે, જેના કારણે હવે અમદાવાદીઓ સતર્ક થઇ ગયા છે અને મુશળધાર વરસાદના કારણે વાહનો ખરાબ થાય નહીં તે માટે પોત પોતાનાં વાહનો સંબંધીઓના ઘરે મૂકી આવ્યા છે.

શનિવારે શહેરમાં થયેલા ધોધમાર વરસાદ બાદ ગઇ કાલે પણ આખો દિવસ ઝરમરથી લઈને ભારે વરસાદ પડ્યો હતો. મેઘરાજા મન મૂકીને વરસતાં અમદાવાદીઓને ગત ૧૦ જુલાઈએ થયેલો અનરાધાર વરસાદ અને તબાહી યાદ આવી જતાં તેઓ ફફડી ઊઠ્યા હતા. જોકે થોડા સમય બાદ વરસાદે વિરામ લેતાં લોકોએ રાહતનો શ્વાસ લીધો હતો.