પાણીદાર ગુજરાતઃ સિંચાઈનું પાણી રાજ્યના છેવાડા સુધી પહોંચ્યું

ગુજરાત સરકારનો ખેડૂતોનાં ખેતર સુધી પાણી પહોંચાડવાનો દઢ નિર્ધાર સફળઃ સૌની યોજના અને સુજલામ સુફલામ યોજનાઓથી રાજ્યમાં વિશાળ કેનાલ નેટવર્ક ઊભું થયું

અમદાવાદ, શનિવાર

ગુજરાતની ભૌગોલિક પરિસ્થિતિ અનુસાર રાજ્યમાં નદીઓનું પ્રમાણ બારમાસી ઓછું છે. રાજ્યભરના મોટા પાણી ભાગના ખેડૂતો ખેતી માટે મહદ્અંશે વરસાદી પર નિર્ભર રહે છે. ખેડૂતોની સિંચાઇનાં પાણીની સમસ્યાથી પૂર્વ મુખ્યપ્રધાન નરેન્દ્ર મોદી ચિંતિત હતા. તેમને જગતના તાતની મહેનત પર વિશ્વાસ હતો કે જો ખેડૂતોના ખેતર સુધી પાણી પહોંચશે તો ખેડૂતો રાજ્યની પ્રગતિમાં મહત્ત્વપૂર્ણ યોગદાન આપશે. માટે પૂર્વ સીએમ નરેન્દ્ર મોદીએ ખેડૂતોનાં ખેતર સુધી પાણી પહોંચાડવાનો દઢ નિર્ધાર કરી લીધો.

બીજી તરફ નર્મદા નદી પર બંધ બાંધ્યા પછી પણ ઘણું પાણી વહી જતું હતું. પૂર્વ સીએમ મોદીએ આ વહી જતાં પાણી ખેડૂતો માટે ઉપયોગી બને તેના માટે સુચારુ આયોજન કર્યું, જેના પરિણામે રાજ્યમાં ઐતિહાસિક સૌની યોજના અને સુજલામ સુફલામ યોજનાઓનો જન્મ થયો અને એટલે જ આજે રાજ્યમાં વિશાળ કેનાલ નેટવર્ક ઊભું થયું છે.

પીએમ મોદીની દેશને લોકભાગીદારીથી જળ સંચયની નવી પદ્ધતિની ભેટ

પીએમ મોદીએ તેમના મુખ્યપ્રધાન તરીકેના કાર્યકાળમાં માત્ર કેનાલ નેટવર્ક જ ઊભું કરીને સંતોષ નહીં માની લેતાં એ કાર્યને વધુ આગળ ધપાવ્યું છે, તેના ભાગરૂપે તેમણે લોકોને જળ સંગ્રહ ક્ષમતા વધારવા માટે પ્રેરિત પણ કર્યા છે, સાથે-સાથે દેશને લોકભાગીદારીથી જળ સંચયનાં કામો કરવાની નવી પદ્ધતિ પણ આપી છે. તેમના જળ સંગ્રહના અભિયાનને આગળ વધારવા માટે રાજ્યમાં સુજલામ સુફલામ જળ અભિયાન શરૂ કરવામાં આવ્યું. સુજલામ સુફલામ જળ અભિયાન હેઠળ ભૂપેન્દ્ર પટેલના મુખ્યપ્રધાન નેતૃત્વમાં પાંચમો તબક્કો પૂર્ણ થયો છે. આ અભિયાન અંતર્ગત રાજ્યના શ્રમિકોને ૨૦.૮૧ લાખ માનવદિનની રોજગારી મળી છે, જેના કારણે રાજ્યની જળ સંગ્રહ ક્ષમતા ૨૪,૪૧૮ લાખ ઘન ફૂટ વધી છે. અંબાજીથી ઉમરગામના આદિવાસી વિસ્તારોમાં લિફ્ટ ઇરિગેશન દ્વારા સિંચાઈનું પાણી પહોંચાડીને આદિવાસી વિસ્તારના ખેડૂતોને સિંચાઈ પૂરી પાડી છે.

ઓછા વરસાદથી પીડિત ઉત્તર ગુજરાતના આઠ જિલ્લાને નવજીવન