તપાસ એજન્સી ED પણ હવે CBIના રસ્તે

વિપક્ષો સતત કહી રહ્યા છે કે હવે સીબીઆઈની જેમ ઈડીનો પણ કેન્દ્ર સરકાર દ્વારા પોતાનો સ્વાર્થ સાધવા અને વિરોધ પક્ષના નેતાઓને ડરાવવા માટે ઉપયોગ કરવામાં આવી રહ્યો છે

આપણા દેશમાં એક સમયે સેન્ટ્રલ બ્યૂરો ઓફ ઈન્વેસ્ટિગેશન (સીબીઆઈ) સર્વોચ્ચ અને સૌથી શક્તિશાળી કેન્દ્રીય તપાસ એજન્સી ગણાતી હતી, પરંતુ હવે સમય બદલાઈ ગયો છે. ૧૯૬૩થી કાર્ય૨ત સીબીઆઈને હજુ થોડા સમય પહેલાં સરકારની કઠપૂતળી ગણાવીને તેની વિશ્વસનીયતા સામે પણ સવાલો કરવામાં આવતા હતા. આ વાત અને સવાલ સાવ પાયાવિહોણા પણ નથી. સુપ્રીમ કોર્ટના ચીફ જસ્ટિસ (સીજેઆઈ) એન.વી. રમન્નાએ તાજેતરમાં જ સીબીઆઈ અને પોલીસની કાર્યવાહી તથા નિષ્ક્રિયતા સામે ગંભીર સવાલો ઉઠાવ્યા હતા. ચીફ જસ્ટિસના મતે તપાસ એજન્સીઓની નિષ્ક્રિયતાથી વિશ્વસનીયતા સામે સવાલો પેદા થઈ રહ્યા છે. તેમણે ઉમેર્યું હતું કે ભ્રષ્ટાચારના આરોપોના કારણે પોલીસની છબી ખુલ્લી પડી ગઈ છે.

ટોચની બંધારણીય સંસ્થાઓ આ રીતે નબળી પડે તે દેશની લોકશાહીના હિતમાં નથી એવું ઘણા નિષ્ણાતો અવારનવાર જણાવી ચૂક્યા છે. સીબીઆઈ હવે જ્યારે ધીમે ધીમે હાંસિયામાં ધકેલાઈ રહી છે ત્યારે અન્ય એક કેન્દ્રીય તપાસ એજન્સી એન્ફોર્સમેન્ટ ડિરેક્ટોરેટ એટલે કે ઈડી સબળ બનીને ઊભરી રહી છે અને તેની પાછળનાં કેટલાંક રાજકીય પરિબળો પણ છે.