હીટ એક્શન પ્લાન: LG હોસ્પિટલમાં હીટ સ્ટોકના દર્દી માટે ૨૦ બેડનો વોર્ડ કાર્યરત

શહેરમાં ૫૫૦થી વધુ પાણીની પરબ, ૯૨ અર્બન અને કોમ્યુનિટી હેલ્થ સેન્ટર ખાતે ORS સેન્ટર શરૂ કરાયાં

અમદાવાદ, મંગળવાર

આ ઉનાળામાં ગરમીના નવા નવા રેકોર્ડ સર્જાશે, તેમાં પણ ગઈ કાલે શહેરમાં ૪૧.૯ ડિગ્રી ગરમી પડતાં લોકો તોબા પોકારી ઊઠ્યા હતા. બપોરે તો અમદાવાદ રીતસરનું અગનભઠ્ઠીમાં ફેરવાઈ ગયું હતું, જોકે કાળઝાળ ગરમી સામે લોકોને રક્ષણ આપવા મ્યુનિ. કોર્પોરેશન આગળ આવ્યું છે. તંત્રના હીટ એક્શન પ્લાન હેઠળ મ્યુનિ. સંચાલિત એલજી હોસ્પિટલમાં ૨૦ બેડનો વોર્ડ ફક્ત હીટ સ્ટ્રોકના દર્દીઓ માટે તૈયાર કરાયો છે.

મ્યુનિસિપલ તંત્રના હીટ એક્શન પ્લાનના નોડલ ઓફિસર અને દક્ષિણ ઝોનના હેલ્થ વિભાગના વડા ડો. તેજસ શાહ આ અંગે વધુ માહિતી આપતાં જણાવે છે કે એલજી હોસ્પિટલમાં હીટ સ્ટ્રોકના દર્દીઓ માટે સૌથી વધુ ૨૦ બેડનો વોર્ડ તૈયાર કરાયો હોઈ અન્ય મ્યુનિ. હોસ્પિટલો જેવી કે એસવીપી હોસ્પિટલ, શારદાબહેન હોસ્પિટલ અને સિવિલ હોસ્પિટલ, સોલા સિવિલ હોસ્પિટલમાં પણ દસ કે તેથી વધુ બેડની વ્યવસ્થા રખાઈ છે.