હવે યુએન મહેતા હોસ્પિટલના ૨,૫૦૦ કર્મચારીના મોબાઈલ ઉપયોગ પર રોક

ક્લાસ-૪ના કર્મચારી ડ્યૂટી અવર્સ દરમિયાન મોબાઈલ ફોનનો ઉપયોગ કરશે તો તેમતી વિરુદ્ધ કાર્યવાહી થશેઃ અગાઉ કેન્સર હોસ્પિટલના એક હજારથી વધુ કર્મચારીના મોબાઈલ વાપરવા પર પ્રતિબંધ મુકાયો હતો

અમદાવાદ, સોમવાર

સિવિલ હોસ્પિટલના કેમ્પસમાં આવેલી ધ ગુજરાત કેન્સર એન્ડ રિસર્ચ ઇન્સ્ટિટ્યૂટ (એમ.પી.શાહ હોસ્પિટલ)ના વર્ગ ચારના તમામ કર્મચારીના મોબાઇલ ફોનના ઉપયોગ પર પ્રતિબંધ મૂકી દેવાના મહત્વપૂર્ણ નિર્ણય બાદ હવે યુએન મહેતા ઇન્સ્ટિટ્યૂટ ઓફ કાર્ડિયોલોજી એન્ડ રિસર્ચ સેન્ટર (યુએન મહેતા હાર્ટ હોસ્પિટલ)માં વર્ગ ચારના કર્મચારીના મોબાઇલ ઉપયોગ પર રોક લગાવી દેવાઇ છે. અંદાજે ૨૫૦૦થી વધુ કર્મચારીના મોબાઇલ ફોનના ઉપયોગ પર રોક લગાવાયો છે. જેનો વિવાદ સર્જાયો છે. ફરજ દરમિયાનમાં કર્મચારી સતત મોબાઇલ ફોનમાં એક્ટિવ હોય છે. કેન્સર હોસ્પિટલની જેમ યુએન મહેતા હોસ્પિટલમાં પણ રાજદીપ એન્ટરપ્રાઇઝ નામની કંપનીનો આઉટ સોર્સિંગનો કોન્ટ્રાક્ટ છે. જેના કારણે હવે તેમના માલિકોને બીજો ઝટકો લાગ્યો છે.