ઈ-મેમોના ડરથી મોડી રાતે પણ સિગ્નલ તોડતા નથી

અમદાવાદીઓ હવે સુધરી ગયા મોડી રાતે રેડ લાઈટ ચાલુ હોય તો વાહનચાલકો સિગ્નલ પર ઊભા રહે છે ટ્રાફિક પોલીસ વગર પણ નિયમો પાળવામાં આવે છે

શહેરની જો કોઇ સૌથી મોટી સમસ્યા હોય તો તે છે ટ્રાફિકની, જેનાથી પોલીસ તેમજ અમદાવાદીઓ ખુદ ત્રાસી ગયા છે. ટ્રાફિકની સમસ્યા માથાના દુખાવા સમાન છે, જેનો ઉકેલ લાવવા માટે પોલીસે કાયદાકીય કડક બનવું જરૂરી છે. જો લોકોમાં ટ્રાફિકની સેન્સ આવશે તો ટ્રાફિક જામની સમસ્યાનો અંત આવી જશે, જેના કારણે પોલીસ હવે એક્શન મોડ પર આવી ગઈ છે. એક સમય એવો હતો કે ધોળા દિવસે પણ વાહનચાલકો સિગ્નલ તોડીને પોતાનું વાહન કોઇ પણ ડર વગર જવા દેતા હતા, પરંતુ હવે તેવું નથી રહ્યું. અમદાવાદીઓ હવે સુધરી ગયા છે તેવું કહેવું ખોટું નથી. મોડી રાતે જ્યારે ટ્રાફિક પોલીસ ના હોય તેવા સમયે પણ અમદાવાદીઓ ટ્રાફિકના નિયમોનું પાલન કરે છે. શહેરનાં દરેક જંક્શન પર ૯૯ ટકા વાહનચાલકો રેડ સિગ્નલ હોય ત્યારે ઊભા રહે છે અને ગ્રીન સિગ્નલ આવે ત્યારે તેમનું વાહન ચલાવે છે.

પોલીસ ટેકનોલોજીથી સજ્જ થઇ રહી છે, જેના કારણે શહેરીજનો હવે ટ્રાફિકના નિયમોનો ભંગ કરતાં પહેલાં દસ વખત વિચાર કરી રહ્યા છે. શહેરમાં પોલીસની કોમ્બિંગ નાઇટ ચાલી રહી છે, જેના કારણે હજારો લોકોનાં વાહનો ડિટેઇન થયાં છે. ડિટેઇન થયેલાં વાહનો છોડાવવા માટે આરટીઓમાં લાંબી લાંબી લાઇનો લાગી છે.