PSIની છાતીમાં કોણી મારીને હાથકડી પહેરેલો રીઢો ચોર ચોથા માળેથી ફરાર

કાલપુર જેવા ભરચક વિસ્તારમાં ધોળા દિવસે આરોપી ફરાર થતાં પોલીસ વધુ વિવાદમાં

ખોખરા પોલીસની બેદરકારીથી આરોપી નાસી છૂટ્યો

નવી પોલીસ કિમશનર કચેરીનું ઉદ્ઘાટન થયા બાદ તો જાણે કે શહેર પોલીસ પર પનોતી બેઠી હોય તેવું લાગી રહ્યું છે. શહેર પોલીસ એક પછી એક વિવાદોમાં આવી રહી છે, જેના કારણે સંખ્યાબંધ પોલીસ કર્મચારીઓને સસ્પેન્ડ થવાના દિવસો આવી ગયા છે. તાજેતરમાં ચાંદખેડા પોલીસ સ્ટેશનમાં આરોપી દંપતીને વીવીઆઇપી ટ્રીટમેન્ટ આપવાનો વિવાદ શાંત નથી પડ્યો ત્યારે ગઇ કાલે ચોરીના કેસનો રીઢો ગુનેગાર પીએસઆઇને છાતીમાં ફેંટ મારીને નાસી જતાં અનેક તર્ક-વિતર્ક સર્જાયા છે. કાલુપુરુ જેવા ભરચક વિસ્તારમાંથી ચોરીનો આરોપી ખોખરા પોલીસ સ્ટેશનના પીએસઆઇ સહિતના કાફલા વચ્ચેથી નાસી જતાં વિવાદ સર્જાયો છે. પોલીસબેડામાં લાંછન લગાવનાર આ ઘટના બાદ પીએસઆઇ સહિતના પોલીસ કર્મચારીઓ ઉપર પણ સસ્પેન્શનની તલવાર લટકી હોય તેવી શક્યતા છે.