નશો કરાવી કરોડોની પ્રોપર્ટી હડપ કરનારા વિરુદ્ધ ડીસીપીએ તપાસના આદેશ આપ્યા

સરદારનગર પોલીસ કુખ્યાત શખ્સો વિરુદ્ધ તપાસ કરશેઃ ચીટર કંપનીએ યુવક પાસેથી કરોડો રૂપિયાની પ્રોપર્ટી લખાવી દીધી

યુવકને એમડી ડ્રગ્સનો નશો કરાવી કરોડો રૂપિયાની પ્રોપર્ટી હડપ કરનાર ચીટર કંપની વિરુદ્ધ ડીસીપીએ સરદારનગર પોલીસને તપાસના આદેશ આપ્યા છે. યુવકની ફરિયાદના આધારે ડીસીપીએ સરદારનગર પોલીસને તપાસ સોંપી છે. યુવકને એમડી ડ્રગ્સનો નશો કરાવ્યા બાદ તેની સાથે હેક કરેલી લુડો ગેમ ગઠિયાઓ રમ્યા હતા. યુવક લુડો ગેમમાં ૧૨ કરોડ રૂપિયા હારી ગયો હતો, જેમાં ચીટર કંપનીએ તેની કરોડો રૂપિયાની પ્રોપર્ટી લખાવી લીધી હતી. આ કાંડમાં અજય, જીતુ રાધે, પરુ સહિતના શખ્સોની સંડોવણી હોવાનો આરોપ થતાં પોલીસે તપાસ તેજ બનાવી છે.

ઈન્દિરાબ્રિજ નજીક આવેલા ભાટ પાસે રહેલા રાજ (નામ બદલ્યું છે) નામનો યુવક હાલ ન્યાયની આશાએ પોલીસના દરવાજા પર ઊભો રહી ગયો છે. રાજ પાસેથી પાંચ કરોડની પ્રોપર્ટી કુબેરનગરના અજય નામના યુવકે લખાવી લીધી છે. અજયે તેના મિત્ર જીતુ રાધે સહિતના લોકો સાથે મળી રાજને નશાના રવાડે એટલી હદે ચઢાવી દીધો કે હાલ તેને રોવાના દિવસો આવી ગયા છે. કુબેરનગરના ક્રિમિનલ માઇન્ડ અજયે રાજ સાથે મિત્રતા કરી હતી અને તે પછી અસલ ખેલ શરૂ કર્યો હતો. માથાભારે શખ્સ અને રાજ બંધબારણે પાર્ટી કરતા હતા. ત્યાર બાદ લુડો ગેમ રમતા હતા.