વસ્ત્રાલકાંડના ટપોરીઓનું કયા પોલીસ અધિકારી સાથે સીધું કનેક્શન: ક્રાઈમ બ્રાંચે તપાસ શરૂ કરી

કુખ્યાત સંગ્રામ અને પંકજ ભાવસારના પોલીસ સાથેના સંબંધો અંગે પોલીસ કમિશનરે તપાસ સોંપી

- 

જે ટપોરી પર પોલીસના ચાર હાથ હોય તે એક દિવસ કુખ્યાત ડોન બની જતો હોય છે, જે સાબિત કરતા અનેક કિસ્સા ભૂતકાળમાં બની ચુક્યા છે. વસ્ત્રાલમાં પણ ગેંગવોર મામલે નિર્દોષ લોકો પર થયેલા હુમલાની ઘટનામાં પણ પોલીસ અધિકારીના ચાર હાથ હોવાનું ચર્ચાઇ રહ્યું છે. કુખ્યાત સંગ્રામસિંહ અને પકંજ ભાવસારના ક્યા પોલીસ અધિકારી સાથે સંબંધ છે તે મામલે પોલીસ કમિશનર જી.એસ.મલિકે ક્રાઇમ બ્રાંચને તપાસ સોંપી છે. બંને માથાભારે તત્ત્વોના જે પણ પોલીસ કર્મચારી કે અધિકારી સાથે સંબંધ હશે તેમની વિરુદ્ધ કાયદેસરની કાર્યવાહી કરવામાં આવશે.

પોલીસની શાખ પર અનેક સવાલો ઊભા કરનાર ટપોરીઓના સરદારને પકડી પાડવા માટે ઝોન -૫ ડીસીપીની લોકલ ક્રાઇમ બ્રાંચ તેમજ રામોલ પોલીસ અસમર્થ નીવડી હોય તેવું સીધું લાગી રહ્યું છે. વસ્ત્રાલમાં આતંકની ઘટના હોળીના દિવસે બની હતી. આજે છ દિવસ થઇ પકડથી ગયા છતાંય પંકજ ભાવસાર હજુ પોલીસ દૂર છે. મુખ્ય આરોપીને પકડવા મામલે પોલીસનું રટણ એક જ છે કે હજુ તપાસ ચાલી રહી છે.