હજ યાત્રાએ લઈ જવાનું કહીને ટૂર ઓપરેટરે પરિવારને રૂ. ૩૮.૧૫ લાખનો ચૂનો લગાવ્યો

ટૂર ઓપરેટર પરિવારનો મિત્ર હોવાનો ઘટસ્ફોટ વિઝા નથી આવ્યા કહી પરિવારને એરપોર્ટથી ઘરે મોકલ્યો

- 

પવિત્ર રમજાન મહિનો ચાલી રહ્યો છે ત્યારે દરિયાપુરના એક પરિવારને હજ યાત્રાએ લઇ જવાના બહાને ટૂર ઓપરેટરે ૩૮.૧૫ લાખ રૂપિયાની છેતરપિંડી આચરી હોવાની ચોંકાવનારી ઘટના સામે આવી છે. ટૂર ઓપરેટર પરિવારનો મિત્ર હતો. જેના કારણે તેણે તમામનો વિશ્વાસ જીતીને રૂપિયા હડપ કરી લીધા હતા. વર્ષ ૨૦૨૩માં હજુ લઈ જવાનું કહીને પરિવારને ગોળગોળ ફેરવી રહ્યો છે. જ્યારે ઘરના ત્રણ સભ્ય એરપોર્ટ પર પહોંચ્યા ત્યારે ટૂર ઓપરેટરે વિઝા નથી આવ્યા તેમ કહીને તેમને ઘરે પરત મોકલી દીધા હતા.

દરિયાપુર વિસ્તારમાં આવેલા ડબગરવાડ પાસે નાને અલીની પોળમાં રહેતા મોહમદફુજેલ શેખે દરિયાપુર પોલીસ સ્ટેશનમાં ઇકબાલહુસેન શેખ (રહે. શિફા હોસ્પિટલ બિલ્ડિંગ, જમાલપુર) વિરુદ્ધ ૩૯.૧૫ લાખની છેતરપિંડીની ફરિયાદ કરી છે. મોહમદફુજેલ સંયુક્ત પરિવારમાં રહે છે અને સાગર એન્ટરપ્રાઇઝ નામથી કિરાણા અને કોસ્મેટિકની ચીજવસ્તુઓ વેચીને ગુજરાન ચલાવે છે. મોહમદકુજેલના પિતા મોહમદસાદિકના મિત્ર ઇકબાલહુસેન શેખ જમાલપુરમાં અકબરી ટૂર્સ નામે ધંધો કરે છે. ઇકબાલહુસેન વર્ષોથી મોહમદસાદિકને મળવા માટે આવતા હતા. જેથી મોહમદકુજેલ પણ તેમને સારી રીતે ઓળખતો હતો.