പിറന്നാൾ ദിവസം ചെയ്യേണ്ടതും പാടില്ലാത്തതും

പിറന്നാളുകാരനോ പിറന്നാളുകാരിയോ അച്ഛനേയും അമ്മയേയും നമസ്ക്കരിച്ച് ക്ഷേത്രദർശനം നടത്തണം

- പി. ജയചന്ദ്രൻ

ഒരു വ്യക്തി ജനിച്ച ദിവസത്തെയാണല്ലോ നമ്മൾ ജന്മദിനം എന്നും പിറന്നാൾ എന്നും പറയുന്നത്. അതൊരു പുണ്യദിനമാണ്. ഈ ഭൂമിയിൽ കാലുകുത്തുവാനായി നമുക്ക് അവസരം ലഭിച്ച ദിവസം. അതുകൊണ്ടുതന്നെ ആ ദിവസം ഏതൊരു വ്യക്തിയും തന്നാൽ കഴിയും വിധം ആഘോഷിക്കാറുണ്ട്. ചിലർ പ്രാർത്ഥനയിൽ മുഴുകിയായിരിക്കും ആഘോഷിക്കുക. ചിലർ ഇഷ്ട ദൈവങ്ങളെ ദർശിച്ച് വഴിപാടുകളും മറ്റും നടത്തി ആഘോഷിക്കും. വേറെ ചിലർ അഗതിമന്ദിരങ്ങളിൽ അന്നദാനം നടത്തും. ഇനിയൊരു കൂട്ടർ വീട്ടിൽ വിഭവസമൃദ്ധമായ സദ്യയൊക്കെയൊരുക്കി, കുടുംബാംഗങ്ങളോടൊത്ത് ഭക്ഷണം കഴിച്ചുകൊണ്ടായിരിക്കും പിറന്നാൾ ആഘോഷിക്കുക.

നമ്മൾ ഭാരതീയരെ സംബന്ധിച്ചിടത്തോളം ജനിച്ച ദിവസത്തിനും തീയതിക്കുമല്ല ജനിച്ച നാളിനാണ് പ്രാധാന്യം കൽപ്പിക്കുന്നത്. വർഷം തോറും, നമ്മൾ ജനിച്ച മാസത്തിൽ നമ്മുടെ നക്ഷത്രം വരുന്ന ദിവസത്തെ ജന്മദിനമായി കണക്കാക്കി ആഘോഷിക്കുന്നത് അതുകൊണ്ടാണ്. 

അന്നേദിവസം പിറന്നാളുകാരൻ എന്തൊക്കെയാണ് ചെയ്യേണ്ടത് എന്നു നോക്കാം.

പിറന്നാളുകാരനോ പിറന്നാളുകാരിയോ അച്ഛനേയും അമ്മയേയും നമസ്ക്കരിച്ച് ക്ഷേത്രദർശനം നടത്തണം. അച്ഛനേയും അമ്മയേയും നമസ്ക്കരിക്കാതെയുള്ള ക്ഷേത്രദർശനം പൂർണ്ണ ഫലപ്രാപ്തി നൽകില്ല. അനന്തരം വീട്ടിൽ വിഭവസമൃദ്ധമായ സദ്യയുണ്ടാക്കി അത് ഒരിലയിൽ വീടിന്റെ ഭാഗത്ത് കൊണ്ടുവച്ച് പിതൃക്കൾക്ക് സമർപ്പിച്ച് പ്രാർത്ഥിക്കണം. അതിനുശേഷം ഒരിലയിൽ ഇഷ്ട ദേവന് വിളക്കുകൊളുത്തി സമർപ്പിക്കണം. പിന്നീട് കുടുംബാംഗങ്ങളുമൊത്ത് സദ്യയുണ്ണാം. ഇനി തെക്കു അഥവാ സദ്യയില്ലെങ്കിൽ പോലും അടുത്തദിവസം ഒരു നേരമെങ്കിലും കുടുംബാംഗങ്ങൾക്കൊപ്പം, പ്രത്യേകിച്ച് അച്ഛനമ്മമാർക്കൊപ്പം വേണം ഭക്ഷണം കഴിക്കുവാൻ.