കയ്യപ്പൻ അയ്യപ്പനായിജന്മസാഫല്യമായി മാറിയ ഗുരുദക്ഷിണ

പാലാഴിമഥനസമയത്ത് ലഭിച്ച അമൃത് തട്ടിയെടുത്ത അസുരന്മാരിൽ നിന്നും അത് വീണ്ട ടുക്കാനായിട്ടായിരുന്നു മഹാവിഷ്ണു മോഹിനിവേഷം ധരിച്ചത്. ആ രൂപം ഒരിക്കൽ കൂടി കാണണമെന്ന മഹേശ്വരന്റെ ആഗ്രഹസാഫല്യത്തിനായി വിഷ്ണു ഒരിക്കൽ കൂടി മോഹിനി രൂപത്തിലെത്തി. മോഹിനി രൂപത്തിലെത്തിയ വിഷ്ണുവിനെ കണ്ട് മോഹിച്ച് അവരിരുവരും സംയോഗത്തിലേർപ്പെട്ടു. പിന്നീട് മഹാവിഷ്ണുവിന്റെ തുട പിളർന്ന് കയ്യിലേക്ക് പിറന്നുവീണ 'കയ്യപ്പൻ' ക്രമേണ അയ്യപ്പനായി.

- ബാബുരാജ് പൊറത്തിശ്ശേരി 9846025010

തന്റെ പ്രിയഭക്തനായ പന്തളത്ത് രാജാവിന് പുത്രന്മാരില്ലാത്ത ദുഃഖം അറിയാവുന്ന പരമശിവൻ കുഞ്ഞിനെ അദ്ദേഹത്തിന് നൽകാൻ തീരുമാനിച്ചു. കുഞ്ഞിന് കഴുത്തിലൊരു മണിമാലയിട്ട് രാജാവ് നായാട്ടിനായി വരുന്ന വഴിയിൽ പമ്പാനദിക്കരയിൽ സുരക്ഷിതമായി കുട്ടിയെ കിടത്തി പരമേശ്വരനും മോഹിനിയും കാത്തിരുന്നു. നായാട്ടിന് വന്ന രാജാവ് കുട്ടിയുടെ കരച്ചിൽ കേട്ട് ഓടിയെത്തി. പമ്പാനദിക്കരയിൽ പാറപ്പുറത്ത് പട്ടിൽ പൊതിഞ്ഞു കിടക്കുന്ന കുട്ടിയെ കണ്ട് അദ്ദേഹം വാരിയെടുത്തു. കഴുത്തിലെ മണിമാല കണ്ട് മണി കഴുത്തിലണിഞ്ഞവൻ എന്നർത്ഥം വരുന്ന മണികണ്ഠനെന്ന പേർ നൽകി കൊട്ടാരത്തിലേക്ക് കൂട്ടിക്കൊണ്ട് പോയി.

യഥാകാലം രാജാവ് മണികണ്ഠനെ രാജഗുരുവിന്റെ ആശ്രമത്തിൽ കൊണ്ടുചെന്നു. മഹാപണ്ഡിതനായ വേദശാസ്ത്ര പാരംഗദനുമായിരുന്ന ഒരു മുനിശ്രേഷ്ഠനായിരുന്നു രാജഗുരു.

"ഗുരോ മണികണ്ഠനെ ഗുരുകുലവാസത്തിനായി അങ്ങയെ ഏൽപ്പിക്കാനാണ് വന്നത്. ഇവൻ വേദശാസ്ത്രങ്ങളിലും ആയുധവിദ്യയിലും പ്രഗത്ഭനായിത്തീരണമെന്നാണ് എന്റെ ആഗ്രഹം. അങ്ങ് എന്റെ മകനെ ശിഷ്യനായി സദയം സ്വീകരിച്ചാലും.

മണികണ്ഠന്റെ തേജസ്സാർന്ന മുഖം കണ്ടപ്പോഴെ മുനിക്ക് അസാധാരണമായ ഒരടുപ്പം അവനോട് തോന്നി. രാജപുത്രനെന്നതിനേക്കാൾ ഒരു പ്രത്യേകത അദ്ദേഹത്തിനവനോട് തോന്നി.