ஸ்ரீராமகிருஷ்ண மகிமை

ஐப்பசி அமாவாசை இரவு அன்று காளி பூஜை விமரிசையாக நடக்கும். தட்சிணேஸ் வர காளிகோயில் மண்டபம் தீபங்களால் அலங்கரிக்கப்பட்டிருக்கும்.

பூஜை தொடங்கும்முன் காளி கோயில் பூஜாரியும் ஸ்ரீராமகிருஷ்ணரின் உறவினருமான ராம்லால் தத்தர் முதலில் குருதேவரைப் பணிந்து அவரது ஆசிகளை வேண்டுவார்.

பகல் பொழுதில் குருதேவர் தமது அறையிலேயே இருப்பார். இரவுதான் அன்னையைத் தரிசிக்கச் செல்வார். நகபத் எனப்படும் வாத்திய மண்டபத்தில் வாத்திய இசை இரவு முழுவதும் ஒலித்துக் கொண்டிருக்கும்.

ஒருநாள் காளிபூஜை சனிக்கிழமை அன்று வந்தது. (வங்காளத்தில் சனிக்கிழமை அம்பிகைக்கு உகந்த நாள்.) அப்போது குருதேவர் எங்களிடம், 'இன்று இரவு ஜபம் செய்யுங்கள். யாரெல்லாம் இதுபோன்ற புனித இரவுகளில் ஜபம் செய்கிறார்களோ அவர்கள் விரைவில் இறைநிலை அடைவார்கள்" என்றார்.

அன்று இரவு குருதேவர் எங்களைத் தூங்கவிடவில்லை. அதிகாலை வரை அவர் பாடிக் கொண்டிருந்தார்.- சுவாமி அத்புதானந்தர்