പുതുവർഷ പുതുരുചി

"മിക്കവാറും ആളുകൾ സദ്യക്ക് പാചകം ചെയ്യുമ്പോൾ സവോളയും ഇഞ്ചിയും വെളുത്തുള്ളിയും ഉപയോഗിക്കും. എന്നാൽ, ഞങ്ങളിവിടെ രസത്തിനും സംഭാരത്തിനും മാത്രമേ ഇഞ്ചി ഉപയോഗിക്കുന്നുള്ളൂ. രുചിയുടെ കാര്യത്തിൽ വരുന്ന വ്യത്യാസത്തിന്റെ ഒരു പ്രധാന കാരണം ഇതാണ്.

- ജി. കൃഷ്ണൻ, gkrishnanmaalam@gmail.​com

ഭക്ഷണം വിശപ്പടക്കാനായിട്ടാണ് കഴിക്കുന്നതെങ്കിലും ഓരോ വിഭവങ്ങൾക്കുമുണ്ട് ഓരോ രുചി. മലയാളികൾക്കെന്നും പ്രിയപ്പെട്ട ആഹാരം ഉച്ച യൂണാണ്. നാടൻ കുത്തരിച്ചോറും കറികളും. അതിൽ പ്രിയപ്പെട്ടതാകുന്നു ഓണസദ്യയും, കല്യാണ സദ്യയും. ഈ രണ്ട് സദ്യകളും വിഭവസമൃദ്ധമാക്കാൻ ഏവരും ശ്രദ്ധിക്കുന്നു.

രണ്ടോ മൂന്നോ കൂട്ടം പായസവും പഴവും പപ്പടവും ചേർത്തുള്ള സദ്യ രുചിയോടെ, തൃപ്തിയോടെ കഴിച്ചുകഴിയുമ്പോൾ ആരും പറയും, "സദ്യ കെങ്കേമം.

ഈ കെങ്കേമം എന്ന വാക്ക് കേൾക്കണമെങ്കിൽ അതിന് ചില ചിട്ടവട്ടങ്ങളുണ്ട്. കൈപ്പുണ്യം വേണം, വൃത്തിവേണം, രുചി വേണം... ഇങ്ങനെ പല കാര്യങ്ങൾ ചേർന്നുവരുമ്പോഴാണ് സദ്യകഴിച്ചവർ സദ്യ നന്നായിരുന്നു എന്ന് പറയുന്നത്.

കേരളത്തിൽ അങ്ങോളമിങ്ങോളം നോക്കിയാൽ തിരുവോണത്തിനായാലും വിവാഹത്തിനായാലും സദ്യയുടെ കാര്യത്തിൽ ചില വ്യത്യാസങ്ങളുണ്ട്. കറികളുടെ എണ്ണത്തിലും രുചിയിലും കാണാം ഈ വ്യത്യാസം.