કોલેજની ફી ભરવી છે? તો ઉપાડો સાવરણો!

આપણે ત્યાં વિદ્યાર્થી ઉત્તમ શિક્ષણ માટે સતત આર્થિક અને સામજિક સંઘર્ષ કરતો જોવા મળે છે. જ્યારે વિદેશમાં વિદ્યાર્થીઓ ‘ઓન કેમ્પસ જોબ' કરી શકે તેવી તમામ વ્યવસ્થા ઊભી કરવામાં આવેલી હોવાથી આર્થિક કારણોને લીધે તેમના અભ્યાસ ઉપર અસર થતી નથી. ગૂજરાત વિદ્યાપીઠે એ દિશામાં પહેલ કરી પણ છે.

- શૈલેષ રાઠોડ

સંતાનો માતાપિતાના પછાતપણાને દૂર કરી શકે છે. આ માન્યતા આપણે આઝાદી પછી સાર્થક થતી જોઈ છે. ગરીબીમાંથી પગભર બનેલાં બાળકો પરિવારને અભાવમાંથી ભાવ તરફ લઈ જાય છે. જેનાં અઢળક ઉદાહરણ છે. જોકે, સંતાનોને સારી સંસ્થામાં ભણાવવા એ માતાપિતા માટે કસોટી સમાન છે. જેટલાં વધુ નાણાં તેટલી વધુ સુવિધા. માતાપિતા જીવનભર તનતોડ મહેનત કરે અને તેની આવક બાળકને ભણાવવામાં ખર્ચાઈ જાય. ઘણી વખત ફી ભરવાના પૈસા ન હોય તો સંતાનનું ભણતર પણ ખોરંભે ચડે.

મહાત્મા ગાંધીએ અમદાવાદના આશ્રમ રોડ પર સ્થાપેલી ગૂજરાત વિદ્યાપીઠ આજે ૧૦૦ વર્ષ પછી પણ ગાંધીવિચારો સાથે આગળ વધી રહી છે. એમાં અભ્યાસ કરતા વિદ્યાર્થીઓને શિક્ષણની સાથે સમૂહ જીવન જીવવાના પાઠ પણ ભણાવાય છે. કેટલાક વિદ્યાર્થીઓ તો એવા પરિવારમાંથી આવે છે જેમના વાલી પાસે આગળના વર્ષની ફી ભરવાની પણ સગવડ હોતી નથી, પરંતુ પૈસાના અભાવે આવા વિદ્યાર્થીઓનો અભ્યાસ ન બગડે અને કોઈની પાસે હાથ લાંબો કરવાની જગ્યાએ સ્વાભિમાનથી જીવી શકે એ માટે વર્ષ ૨૦૧૫થી યુવા સ્વાભિમાન કાર્યક્રમ શરૂ કરવામાં આવ્યો છે.

કોરોના કાળ બાદ એક સમયે સુરેન્દ્રનગર જિલ્લાની પ્રાચી દસાડિયા નામની ધો.૧૦ની વિદ્યાર્થિની ફી ભરી શકે તેવી સ્થિતિમાં નહોતી. તેના પિતા લિવિંગ સર્ટિફિકેટ કઢાવવા શાળાએ ગયા પરંતુ પ્રાચીની શિક્ષણ પ્રત્યેની ધગશ જોઈ શાળા સંચાલકોએ અભ્યાસ ચાલુ રાખવાનો આગ્રહ કર્યો હતો. ફી ભરવામાં થોડી છૂટછાટ આપી હતી. પરિણામ જાહેર થતાં જ આ વિદ્યાર્થિની ૯૯.૯૯ પીઆર મેળવી સમગ્ર રાજ્યમાં પ્રથમ આવી હતી. દીકરીએ સમગ્ર રાજ્યમાં ડંકો વગાડી દીધો એની પાછળ તેનાં માતા-પિતાની તનતોડ મહેનત પણ રહેલી હતી. જો વિદેશની જેમ કે પછી વિદ્યાપીઠની જેમ આવા વિદ્યાર્થીઓને ઓન કેમ્પસ આવી તકો ઉપલબ્ધ થાય તો આર્થિક કારણોને લીધે અભ્યાસમાં વિઘ્ન ન આવે.