રાજકાજ

શેખ હસીનાના પ્રત્યાર્પણની ભારતને ફરજ પાડી શકાય ખરી?

બાંગ્લાદેશમાં હિન્દુઓ ઉપર થતાં હુમલા અને હિંસા સામે ભારતે અવાજ ઉઠાવ્યા પછી બાંગ્લાદેશની સરકારે વળતા પ્રહારરૂપે ભારતને ભીંસમાં લેવા બાંગ્લાદેશના ભૂતપૂર્વ વડાંપ્રધાન શેખ હસીનાના પ્રત્યાર્પણની સત્તાવાર રીતે માગણી કરી છે. ભારત-બાંગ્લાદેશ વચ્ચે અપરાધીઓના પ્રત્યાર્પણની સંધિ થયેલી છે અને બાંગ્લાદેશમાં શેખ હસીના સામે ભ્રષ્ટાચારથી માંડીને અન્ય અનેકવિધ પ્રકારના ગુનાઓ અંગે લગભગ ૨૦૦ જેટલા કેસ કરવામાં આવ્યા છે અને એ રીતે શેખ હસીનાને અપરાધી ઠરાવીને પ્રત્યાર્પણ સંધિ અનુસાર શેખ હસીનાને સુપરત કરવાની માગણી બાંગ્લાદેશની વચગાળાની સરકારના વડા મહમ્મદ યુનુસે કરી છે. વાસ્તવમાં શેખ હસીના સામેની ફરિયાદો અને કેસો રાજકીય કારણસરના અને બદલાની ભાવનાથી થયેલા છે. શેખ હસીનાને રીઢા ગુનેગાર કે અપરાધીની શ્રેણીમાં મૂકી શકાય નહીં, પરંતુ બાગ્લાદેશની વચગાળાની સરકાર ભારત પાસે પ્રત્યાર્પણ સંધિના અમલની અપેક્ષા રાખે છે. તેને કારણે માત્ર બાંગ્લાદેશ જ નહીં તો સમગ્ર વિશ્વ અને ખાસ કરીને પાકિસ્તાન જેવા મુસ્લિમ દેશો ભારતની પ્રતિક્રિયા અને ભારતના ભાવિ પગલાં અંગે ઉત્સુકતા દર્શાવી રહ્યા છે.