જીવનરક્ષક બનવા તરફ ટેક્નોલોજીની આગેકૂચ

ટૅક્નોલોજી રૉકેટ ગતિથી વિકસીને વિસ્તરી રહી છે ત્યારે માનવ જીવનના તમામ સ્તરે તેનો પ્રભાવ વધી રહ્યો છે. અન્ય ક્ષેત્રોની સાથે હવે આપણા આરોગ્ય ક્ષેત્રે પણ ટૅક્નોલોજીનું પદાર્પણ થઈ ચૂક્યું છે. આમ પણ પરાપૂર્વથી ‘હેલ્થ ઇઝ વેલ્થ'માં તો આપણે સૌ માનીએ જ છીએ, ત્યારે આ ટૅક્નોલૉજી જીવન અને આરોગ્યને કઈ રીતે ઉપકારક બની રહેશે એ જોવું રસપ્રદ બની રહેશે.

- સુશીલા મેકવાન

ગત વર્ષે સિંગાપોરમાં બનેલો એક બનાવ આપણને સૌને આશ્ચર્યચકિત કરી દે તેવો છે. મહંમદ ફિતરી નામનો યુવક બાઇક લઈ સૂમસામ રસ્તે જતો હતો. અચાનક એક વૅનની ઠોકરે એ પડી ગયો. આસપાસ કોઈ જ નહોતું. હા, એના કાંડા ઉપર હતી સ્માર્ટ વૉચ, જેણે સ્માર્ટ કામ કર્યું. તેણે તરત જ ઇમર્જન્સી કોન્ટેક્ટમાં જઈ પહેલો કૉલ ડૉક્ટરને એમ્બ્યુલન્સ મોકલવા માટે કર્યો તે પણ લૉકેશન સહિત અને બીજો કૉલ તેની ગર્લફ્રેન્ડને કર્યો. તમને થશે આવું તે હોતું હશે! પરંતુ ના, જે લોકો આ ટૅક્નોલૉજીનો ઉપયોગ કરી રહ્યા છે તેમને આ વાત નવી નહીં લાગે. સ્માર્ટ વૉચ શરીરના સંપર્કમાં હોય અને કંઈક અકસ્માત થાય ત્યારે ઘડિયાળમાં ‘હાર્ડ ફોલ’ ડિટેક્ટ થાય અને તરત જ ઇમરજન્સી નંબર ઉપર મેસેજ જાય. છે ને ટૅક્નોલૉજીની માનવજાત માટેની ઉપકારક સેવા!

હેલ્થ ઉપકરણોની ઉપલબ્ધિથી આપણને ઉપયોગી ગૅજેટ્સ અને ડિવાઇસ મળ્યાં છે. જેનાથી આપણાં શરીરમાં થતાં પરિવર્તનને પારખી લઈ આપણે તેનો ઇલાજ કરી શકીએ છીએ. હરિયાણાના યમુના નગરમાં રહેતા ૩૦ વર્ષીય ડેન્ટિસ્ટ નિતેશ ચોપરા તથા તેમની પત્નીએ તો તેમને થયેલ સુખદ અનુભવ પછી સ્માર્ટ વૉચ બનાવતી કંપનીના માલિકને આભાર પત્ર લખ્યો હતો. કંપનીના માલિક તરફથી વળતો હૂંફાળો પ્રતિભાવ પણ મળ્યો હતો. નિતેશ ચોપરાને એમની સ્માર્ટ ઘડિયાળ દ્વારા રિપિટેડલી ઍલાર્મ મેસેજ મળવાના શરૂ થયા તેથી પતિ પત્ની ચેતી ગયાં અને ડૉક્ટરનો સંપર્ક કર્યો તો, તેમના હાર્ટમાં ૯૯.૯ બ્લોકેજ હતું. વૉચનો ઇ.સી.જી રિપોર્ટ તેમને ડૉક્ટર સુધી દોરી ગયો અને સફળ સર્જરી પછી તેમની જિંદગી બચી ગઈ.