યુરોપિયન ભરવાડોની છાશ

ઠંડા દેશોની નકલ કરીને ગુજરાતી ઉનાળામાં લંચની શરૂઆતમાં સૂપ લેવો જોઈએ એવું પ્રમાણપત્ર આપનારાને વિદેશીઓની પેટની ગરબડ અંગે ઝઝી ખબર નથી હોતી પેટમાં રહેલા બેક્ટેરિયા મનુષ્યની શારીરિક - માનસિક બંને પ્રકારના સ્વાસ્થ્ય પર સીધી ’ને સક્ષમ અસર પાડે છે. પેટમાં અમુક પ્રકારના બેક્ટેરિયા પૂરતી સંખ્યામાં હોય તો જ સ્વાસ્થ્ય ઠેકાણે રહે

- ગૌરાંગ અમીન

પેટને પ્યારું કે પરમ ના કહો તોય એ પાવરમાં રહેશે

ક્લાસ કોનો પ્રાઇમ છે કે પીટ સાચું પાચન ખરું કહેશે 

દીપાવલીની ઉજવણીના ભાગ રૂપે સૌએ ઓછાં વધતાં અંશે પેટમાં ઘણું પધરાવ્યું હશે. જોકે સામાન્ય જીવનમાં પણ દબાવીને ખાનારા ખાય જ છે. સામે પક્ષે ઘરનું નિયમિત ભોજન કરનારાની સંખ્યા ઓછી નથી. પેટ કરાવે વેઠ એ કહેવત એક રીતે અનુભવ પરથી સમજી શકાય. ખાવું મહત્ત્વનું કે ખાધું હોય તેનું પાચન થવું મહત્ત્વનું? મેજિક બોક્સ કહેવાતા પેટની ગરબડ વિચિત્ર વેઠ કરાવી શકે છે. સારું છે કે કોરોના ફાટ્યા પછી શરીરની તંદુરસ્તી ’ને સશક્તિકરણ પર વધુ ભાર મૂકાઈ રહ્યો છે. સૌ જાણે છે કે પેટ બરાબર કામ ના કરે તો મન સાથે તન ઠેકાણે ના રહે. ગ્લોબલ તેમ જ ડિજિટલ વિલેજના આ કાળમાં ખાધાખોરાકી અંગેની અવનવી ચીજો વિદેશમાંથી ભારતમાં ઉપલબ્ધ થઈ રહી છે. પોષણ આપે એવી કે દૈહિક તકલીફ દૂર કરવામાં મદદ કરે એવી વસ્તુઓ પારકા દેશની હોય કે સાવ અજાણી હોય તેથી શું? જે મનુષ્યને હેલ્થ ’ને ફિટનેસમાં રસ છે તેના માટે શરીર માટે સારું એ મારું. રોગ નાનો હોય કે મોટો, દૂર કરવા માનવી દુશ્મનના ઘરનું અન્નજળ પણ સલામ કરીને ગ્રહણ કરી શકે. હા, ઘરનું હાથવગું હોય એ અતિ ગમતીલું લાગે. સારા પેટ કે સારા પાચન માટે ઘરની છાશ આપણું પોતાનું પીણું છે જ. તો બહારનું ’ને સારું કહેવાય એવું બીજું ’ને નવું શું?