ભાવિ રાજનીતિ માટે લાલ બત્તી સમાન એક સર્વેક્ષણ

૨૦૨૨ની વિધાનસભાની ચૂંટણીમાં એક મુદ્દો આંખે ઊડીને દશ્યમાન થઈ રહ્યો છે તે ભાજપમાં થયેલી બળવાખોરી અને ભાજપથી દૂર થઈ રહેલા યુવા મતદારો. આ પહેલી એવી ચૂંટણી છે કે જેમાં ભાજપમાંથી ટિકિટ ન મળતા આટલા મોટા પ્રમાણમાં બળવાખોર ઉમેદવારોએ ઉમેદવારી કરીને ભાજપના હાઈકમાન્ડને પડકાર ફેંક્યો હોય. ઓગણીસ બેઠકો પર ભાજપના જ બળવાખોર ઉમેદવારો ભાજપના જ ઉમેદવારોને ટક્કર આપી રહ્યા છે

- ડો. જયેશ શાહ

ગુજરાત વિધાનસભાની ચૂંટણીનો પ્રચાર હવે ધીમે ધીમે રંગ પકડી રહ્યો છે. ભાજપના નેતાઓ ‘કાર્પેટ બૉમ્બિંગ’ એટલે કે દરરોજ ઓછામાં ઓછા ૭૫થી વધારે વિધાનસભા બેઠકો પર પ્રચાર સભાઓ કે રેલીઓ કે રોડ શૉ કરી રહ્યા છે. આમ આદમી પાર્ટીના અરવિંદ કેજરીવાલ અને ભગવંત માન પણ સતત પ્રચાર કરી રહ્યા છે. કોંગ્રેસના કેન્દ્રીય નેતૃત્વ દ્વારા બહુ સભાઓ નથી કરવામાં આવી રહી, પરંતુ નાની-નાની સભાઓ દ્વારા પ્રચાર કરવામાં આવી રહ્યો છે અને તેઓ દ્વારા ગ્રામીણ વિસ્તારોમાં વધારે ધ્યાન આપવામાં આવી રહ્યું છે.

છતાં પણ ગુજરાતનો મતદાર હજી એનું મન કળવા દેતો નથી એટલે તમામ રાજકીય પક્ષો અને રાજકીય સમીક્ષકો મૂંઝવણ અનુભવી રહ્યા હોય એવું દ્રશ્યમાન થઈ રહ્યું છે. આ ચૂંટણીમાં કોઈ ‘વ’ દેખાઈ રહ્યો નથી તો કોઈ એવા બે કે ત્રણ મુદ્દાઓ પણ પ્રચારમાંથી બહાર નથી આવ્યા કે જેને કારણે મતદાર મોટી સંખ્યામાં મતદાન કરવા માટે બહાર નીકળે. આમ આદમી પાર્ટી દ્વારા શિક્ષણ અને આરોગ્યના મુદ્દા ઉઠાવવામાં આવ્યા હતા, પણ હવે તેમાંથી હવા નીકળી રહી હોય તેવું દેખાઈ રહ્યું છે તો કોંગ્રેસ દ્વારા મોંઘવારી અને બેરોજગારીના મુદ્દા ઉઠાવવામાં આવી રહ્યા છે, પણ એની અસર મતદારો પર થતી હોય એવું દેખાઈ રહ્યું નથી.

ભાજપમાં થયેલી બળવાખોરી

૨૦૨૨ની વિધાનસભાની ચૂંટણીમાં એક મુદ્દો આંખે ઊડીને દશ્યમાન થઈ રહ્યો છે તે ભાજપમાં થયેલી બળવાખોરી અને ભાજપથી દૂર થઈ રહેલા યુવા મતદારો. આ પહેલી એવી ચૂંટણી છે કે જેમાં ભાજપમાંથી ટિકિટ ન મળતા આટલા મોટા પ્રમાણમાં બળવાખોર ઉમેદવારોએ ઉમેદવારી કરીને ભાજપના હાઈકમાન્ડને પડકાર ફેંક્યો હોય. ઓગણીસ બેઠકો પર ભાજપના જ બળવાખોર ઉમેદવારો ભાજપના જ ઉમેદવારોને ટક્કર આપી રહ્યા છે. બાર બેઠકો પર ભાજપમાંથી છેલ્લા મહિનામાં કોંગ્રેસમાં જઈને કોંગ્રેસના ઉમેદવાર તરીકે જ મૂળ ભાજપના ઉમેદવારો ચૂંટણી લડી રહ્યા છે. ઉદાહરણ તરીકે ડભોઈમાં કોંગ્રેસના ઉમેદવાર મૂળ ભાજપના ભૂતકાળમાં ચૂંટાયેલા ધારાસભ્ય છે તો સાવલી બેઠક પર કોંગ્રેસના ઉમેદવાર રાઉલજી ભાજપના સહકારી આગેવાન જ હતા.