એચ-૧બી વિઝાના અરજદારોને પુછાતા સવાલો

અન્ય પ્રકારના નૉન-ઇમિગ્રન્ટ વિઝાની જેમ ‘એચ-૧બી’ વિઝાના અરજદારોએ અમેરિકામાં કાયમ રહેવા નથી ઇચ્છતા એવો નૉન-ઇમિગ્રન્ટ ઇરાદો પ્રદર્શિત કરવાનો નથી રહેતો

- ડો.સુધીર શાહ

અમેરિકન માલિકોએ એમને ત્યાં કામ કરવા પરદેશથી કોઈને બોલાવવો હોય તો સૌપ્રથમ તો લેબર સર્ટિફિકેશન કરાવવું પડે છે. લેબર ડિપાર્ટમૅન્ટને પુરાવાઓ સહિત એવી ખાતરી કરાવી આપવી પડે છે કે એમને જે કાર્ય માટે, જે પ્રકારની જાણકારીવાળી વ્યક્તિ જોઈએ છે, એ અમેરિકામાં ઉપલબ્ધ નથી. જો ઉપલબ્ધ હોય તો એ એમને ત્યાં કામ કરવા રાજી નથી. આવી ખાતરી કરાવી આપે એટલે લેબર ડિપાર્ટમૅન્ટ એમને પરદેશથી એવી વ્યક્તિને એમને ત્યાં કામ કરવા માટે બોલાવવા ની પરવાનગી આપે.

એ કંપનીએ ત્યાર બાદ ‘ધ ઇમિગ્રેશન ઍન્ડ નૅશનાલિટી ઍક્ટ, ૧૯૫૨’ હેઠળ જે ચાર જુદી-જુદી ઍપ્લૉયમૅન્ટ બેઝ્ડ પ્રેફરન્સ કૅટેગરીઓ છે એની હેઠળ જે મુજબની લાયકાત ધરાવતી વ્યક્તિને એમને પોતાને ત્યાં કામ કરવા બોલાવવી હોય, એના લાભ માટે જે કૅટેગરી યોગ્ય હોય એની હેઠળ પિટિશન દાખલ કરવાની રહે છે. વાર્ષિક ૧,૪૦,૦૦૦ ક્વોટાના બંધનના કારણે આ ચાર જુદી-જુદી ઍમ્પ્લૉયમૅન્ટ બેઝ્ડ પ્રેફરન્સ કૅટેગરી હેઠળ જે પિટિશનો દાખલ કરવામાં આવે છે. એની હેઠળ ઇમિગ્રન્ટ વિઝા મેળવતાં બેથી માંડીને વીસ યા એથી પણ વધુ વર્ષ વાટ જોવાની રહે છે. આટલો લાંબો સમય અમેરિકન માલિકો વાટ જોઈ ન શકે. આથી એમની સગવડ ખાતર અમેરિકાની સરકારે એમના કાયદામાં ખાસ ‘એચ-૧બી’ વિઝા ઘડ્યા.