નીતિશ કુમારનું નેતૃત્વ બિહાર ભાજપની મજબૂરી

બિહારમાં જાતિવાદી સમીકરણો ચૂંટણીમાં મહત્ત્વનો ભાગ ભજવે છે અને ત્યાંના પછાતવર્ગો ઉપર નીતિશ કુમારના પ્રભાવને નકારી શકાય તેમ નથી

- ચાણક્ય

ગૃહપ્રધાન અમિત શાહના એક ટીવી ચેનલના ઇન્ટરવ્યૂ અને બિહાર જનતા દળ (યુ) દ્વારા રાજ્યમાં પ્રગતિ યાત્રા માટે પ્રસિદ્ધ કરાયેલા એક પોસ્ટરને પગલે આવી રહેલી બિહાર વિધાનસભાની ચૂંટણીનું નેતૃત્વ કોણ ક૨શે તેને વિશે ચર્ચા અને વિવાદ છેડાયા હતા. ભાજપ સહિતના બિહાર એનડીએના ઘટક પક્ષોમાં સર્જાયેલા અસમંજસ અને વિવાદ બહુ આગળ વધે તેમ જ કાર્યકરોમાં ગેરસમજ ફેલાય એ પહેલાં જ ભાજપ દ્વારા આ મુદ્દે સ્પષ્ટ જાહેરાત કરી દેવામાં આવી કે બિહાર વિધાનસભાની ચૂંટણી મુખ્યપ્રધાન નીતિશ કુમારના નેતૃત્વ હેઠળ જ લડાશે. ભાજપની ૩૧ સભ્યોની કોર કિંમટીની બેઠકમાં આ નિર્ણય લેવામાં આવ્યો હતો અને બિહાર ભાજપના પ્રમુખ દિલીપ જયસ્વાલે તેની જાહેરાત કરી હતી. અત્રે એ ઉલ્લેખનીય છે કે અમિત શાહે એક ટીવી ચેનલ સાથેના ઇન્ટરવ્યૂમાં તેમને જ્યારે પૂછવામાં આવ્યું કે મહારાષ્ટ્રની માફક બિહારમાં પણ મુખ્યપ્રધાનપદના કોઈ ચહેરા વિના જ ચૂંટણી લડવામાં આવશે? તેના જવાબમાં અમિત શાહે કહેલું કે, તેનો નિર્ણય અમે સાથે બેસીને કરીશું.