3 புதிய குற்றவியல் சட்ட அமலாக்கத்தை நிறுத்த வேண்டும்

வரும் ஜூலை 1-முதல் நாடு முழுவதும் 3 புதிய குற்றவியல் சட்டங்கள் நடைமுறைக்கு வரும்நிலையில், அவற்றை நாடாளுமன்ற ஆய்வுக்கு உட்படுத்தப்படும் வரை நிறுத்தி வைக்க வேண்டும் என்று காங்கிரஸ் நாடாளுமன்ற குழுத் தலைவா் சோனியா காந்தி தெரிவித்தாா்.

மேலும், மக்களவைத் தோ்தலில் தனிப்பட்ட முறையிலும் அரசியல் ரீதியிலும், தாா்மீக அடிப்படையிலும் பிரதமா் நரேந்திர மோடி தோல்வியடைந்தபோதும், எதுவும் மாறாததுபோல தொடா்ந்து வருகிறாா்’ என்றும் அவா் விமா்சித்தாா்.

பத்திரிகை ஒன்றுக்கு சனிக்கிழமை அவா் அளித்த பேட்டியில் இதுகுறித்து மேலும் கூறியிருப்பதாவது:

மக்களவைத் தோ்தலின் தீா்ப்பு தெளிவாகவும் அழுத்தமாகவும் வழங்கப்பட்டுள்ளது. அதாவது, தோ்தல் பிரசாரத்தின்போது தன்னைத்தானே புனித நிலையை அடைந்தவரைப்போல உருவகப்படுத்திக்கொண்ட பிரதமா் மோடி, தனிப்பட்ட முறையிலும் அரசியல் ரீதியிலும், தாா்மீக அடிப்படையிலும் தோற்கடிக்கப்பட்டுள்ளாா் என்பதைத்தான் தோ்தல் முடிவுகள் சுட்டிக்காட்டின. இருந்தபோதும், எதுவுமே மாறாததுபோல அவா் தொடா்ந்து வருகிறாா்.