ஆற்றல்மிகு அம்பேத்கர்!

தமிழ் நாட்டில் எந்த ஊருக்குச் சென்றாலும், அங்கு ஒரு சிலையை நாம் பார்க்க முடியும். பலரால் வணங்கப்படுபவர்; ஆனால் உண்மையில் வெகு சிலரால் மட்டுமே சரிவர புரிந்து கொள்ளப்பட்ட வரான இந்தியாவின் மிகச் சிறந்த ஆளுமைகளில் ஒருவரான டாக்டர் அம்பேத்கரின் சிலைதான் அது.

- இரா.கதிரவன்

பலராலும் ஒரு சட்ட நிபுணராக மட்டுமே அறியப்பட்ட டாக்டர் அம்பேத்கர் பன்முகத் திறமை வாய்ந்த மிகப்பெரிய ஆளுமை. வழக்குரைஞர், பொருளாதார நிபுணர், ஆசிரியர், கல்வியாளர், அரசியல் கட்சி நிறுவனர், தொழிற்சங்கவாதி, விவசாயிகளுக்காகப் போராடியவர், எழுத்தாளர், பேச்சாளர், நாடாளுமன்றவாதி, சிந்தனையாளர், சமூக சீர்திருத்தவாதி, பத்திரிக்கையாளர் என அவர் தன்னை ஈடுபடுத்திக்கொள்ளாத துறையே இல்லை எனலாம்.

தனிப்பட்ட மனிதர் என்ற முறையில் மிகச் சிறந்த ஒழுக்கசீலர். மது அருந்தாதவர். மூன்று வெவ்வேறு பல்கலைக்கழகங்களில் பயின்றவர். முயற்சித்திருந்தால் மேலை நாடுகளில் ஏதேனும் ஒரு பல்கலைக்கழகத்தில் பேராசிரியராகவோ, சிறு சமரசங்களைச் செய்து கொண்டு இருந்தால் இந்தியாவில் ஏதேனும் ஒரு அரசவையில் ஆலோசகராகவோ பணியாற்றி அவரால் பொருள் சேர்த்திருக்க முடியும். ஆனால் அவ்வாறன்றி, தான் சார்ந்த மக்களின் நல்வாழ்வுக்காக ஏழ்மையை ஏற்றுக்கொண்டு உழைத்தார்.

மனிதவள மேலாண்மைத் துறையின் முதல் விதியாக சொல்லப்படுவது எதுவெனில், 'ஒவ்வொரு மனிதனும் அளப்பரிய ஆற்றலின் உறைவிடம்' என்பதாகும். அதை மெய்ப்பித்தார். இரா.கதிரவன்

சிரமங்களுக்கிடையிலே அவர், ஒரு கடும் உழைப்பாளி, விடாமுயற்சியாளர், போராளி. ஆயினும் அகிம்சாவாதி. அவர் தனது திறமை, உழைப்பு, நேரம் அனைத்தையும் தன்னைச் சார்ந்திருந்த ஏழை எளியவர்களுக்குச் செலவிட்டார். இவ்வளவு திறமைகளையும் பன்முகத்தன்மையும் ஒருசேரப் பெற்ற அரசியல் வாதிகள் இந்தியாவில் ஒரு சிலரே அப்போது இருந்தனர்.