મોબાઈલ ફોનના વધુ પડતા ઉપયોગથી ટેક્સ્ટ નેક સિન્ડ્રોમના દર્દીઓ વધ્યા

માથા-ખભાનો દુખાવો, હાથમાં દુખાવો અને ખાલી ચઢી જવા જેવી અનેક ગંભીર ફરિયાદ સાથે લોકો ડોક્ટરના શરણે

અમદાવાદ, ગુરુવાર

મોબાઈલ ફોન અને લેપટોપનો ઉપયોગ લોકોનાં રોજિંદાં કામને સરળ બનાવે છે, પરંતુ તેના વધારે પડતા ઉપયોગના કારણે અનેક સમસ્યાઓ ઊભી થાય છે. મોબાઈલ અને લેપટોપનો ઉપયોગ વધારે કરનારા ૮૦ ટકા લોકો ન્યૂરોલોજિયા એટલે કે નસના દુખાવાનો શિકાર બની જાય છે. મોટા ભાગે ૧૮થી ૩૦ વર્ષની ઉમરવાળા લોકો મોબાઇલનો ઉપયોગ કરતા વધુ જોવા મળ્યા છે. આ ઉંમરના લોકો મોબાઇલનો ઉપયોગ એકથી બે કલાકના બદલે સતત ત્રણથી ચાર કલાક સુધી કરતા હોવાનું તારણ છે.

એક સંશોધન પ્રમાણે દિવસે ને દિવસે આ તકલીફ વધુ ને વધુ લોકોમાં જોવા મળી રહી છે. આ તકલીફ બાળકોથી લઈને ઘરડાં એટલે કે બધી ઉમરના લોકોમાં જોવા મળી રહી છે. ડોક્ટરોના મતે માથું નીચે રાખીને મોબાઈલનો સતત ઉપયોગ કરવાથી ગરદનનો દુખાવો થવાની સમસ્યામાં વધારો થાય છે. આ દુખાવાને ‘ટેક્સ્ટ નેક સિન્ડ્રોમ’ કહેવામાં આવે છે.