પોલીસની ઓળખ આપી મહિલાઓને હવસનો શિકાર બનાવતો ઠગ ઝડપાયો

મેટ્રોમોનિયલ સાઇટ પર ઠગે મહિલાને પોતાની ઓળખ પોલીસ તરીકે આપી હતી: લગ્નની લાલચ આપી મહિલા સાથે શરીર સંબંધ બાંધ્યા

અમદાવાદ, ગુરુવાર

મેટ્રોમોનિયલ સાઇટ ૫ર પોલીસ બની મહિલાને દગો કરનાર શખ્સનો પર્દાફાશ પોલીસે કરતાં તેની ધરપકડ કરી લીધી છે. મહિલાને લગ્નની લાલચ આપી શાતિર આરોપીએ તેની સાથે શરીરસુખ માણ્યું. ત્યાર બાદ તેને તરછોડી દીધી હતી.

બોટાદ જિલ્લાના રાણપુર તાલુકાના ઝાડિયા ગામનો રહેવાસી પરેશ સુથાર હાલ પોલીસ કસ્ટડીમાં આવી ગયો છે. પરેશ સુથાર હત્યા, લૂંટ કે પછી મારામારી જેવા ગુના આચરવામાં નહીં, પરંતુ પોતે પોલીસ કર્મચારી છે તેવું કહીને મહિલાઓને પોતાની હવસનો શિકાર બનાવવામાં માહેર હતો. મેટ્રોમોનિયલ સાઇટ પર પોલીસ હોવાની ઓળખ આપી પરેશ સુથારે મહિલાઓ સાથે સંબંધ બાંધ્યા હતા. વટવા પોલીસે એક મહિલાની ફરિયાદના આધારે તેની ધરપકડ કરી લીધી છે.