வழிகாட்டிகள்!

அரசுப் பணியில் நாள்தோறும் காவல்துறை வழக்கு சார்ந்த மருத்துவப் பணிகளை பலவிதமாக பார்த்திருப்பதால் அவற்றை குறித்து சாட்சியம் சொல்வதற்காக நான் அடிக்கடி பல்வேறு நீதிமன்றங்களுக்குச் செல்ல வேண்டியிருக்கும்.

- டாக்டர் அகிலாண்ட பாரதி

எந்த நீதி மன்றத்திற்குச் சென்றாலும் தெரிந்தவர் ஒருவர் எதிர்ப்படுவார். என்னுடன் ஒன்றுக்கு மேற்பட்ட முறை நீதிமன்றத்திற்கு வந்த சக மருத்துவர் ஒருவர், எல்லா கோர்ட்லயும் ஆள் தெரிஞ்சு வச்சிருக்கீங்க! அது எப்படி? என்று கேட்டார்.

நீதிமன்றங்கள் மட்டுமல்ல, எந்த ஊர் அரசு அலுவலகத்திற்குச் சென்றாலும் அங்கு சங்கரன்கோவில் காரர் ஒருவராவது இருப்பார். இத்தனை அரசுத்துறைகள் இருக்கின்றன என்பதை இவர்களைப் பார்த்த பிறகு தான் எனக்குத் தெரியும்.

ஆண்டுதோறும் நூற்றுக்கணக்கான அரசு ஊழியர்களை உருவாக்கும் ஊராக எங்கள் ஊர் இருக்கிறது. இங்குள்ள சிறு மருத்துவமனைகளில் உதவியாளர்களாகப் பணிபுரியும் பெண்கள், என்னிடம் நோயாளிகளாக வருபவர்கள், மளிகைக் கடைகள் மற்றும் ஜவுளி கடைகளில் பணிபுரிபவர்கள் இப்படிப் பலரும் அரசுப் பணிகளுக்காக பயிற்சி யெடுத்து வருகிறார்கள். மற்ற ஊர்களில் பன்னிரண்டாம் வகுப்பு முடித்துவிட்டு எந்தக் கல்லூரியில் சேரலாம் என்று யோசிப்பவர்களைத் தான் பார்த்திருக்கிறேன். இங்கு நிறைய பேர் கல்லூரியைப் பற்றி நினைப்பதே இல்லை.

பள்ளி முடித்தவுடன் நேராக தட்டச்சு, சுருக்கெழுத்து வகுப்புகளில் சேர்ந்து விடுகிறார்கள். அப்படியே டிஎன்பிஎஸ்சி கோச்சிங்கிலும் இணைகிறார்கள்.

இன்றைக்கும் கோவிலுக்குச் சென்றால் அங்கே பிரகாரத்தில் ஓரமாக அமர்ந்து ஒரு மாணவன் சுருக்கெழுத்து எழுதிக் கொண்டிருப்பதைப் பார்க்கலாம். பூங்காக்கள், ரயில் நிலையங்கள் என்று எங்கு பார்த்தாலும் அடுத்த மாதம் வரும் அரசுப் பணியாளர் தேர்வாணையத்தின் தேர்வுக்கு தயாராகும் மாணவர்கள் சிலர் படித்துக் கொண்டிருக்கிறார்கள். இவர்களின் பெரும்பாலானோர் வறுமை கோட்டிற்குக் கீழே உள்ளவர்கள். ஒற்றை அறை தான் அவர்களது வீடு. வீட்டில் அமர்ந்து படிக்க இடம் இருக்காது.